KUCHING: Sektor peribit sedia deka nyaup perintah ngubah ekonomi nuju ekonomi digital, ke ulih ngasilka penatai pemisi tinggi Sarawak enggau rayat.
Kepala Menteri, Datuk Patinggi Abang Johari Tun Openg madahka nya asil ari randau enggau sektor peribit bekaul enggau ekonomi digital.
Iya madah, ngena peluang nya mega perintah nengeri meri penerang ngagai sektor peribit pasal blueprint ke dikemeran sereta dikemeratka perintah dikena ngubah ekonomi ngagai ekonomi digital.
“Sektor peribit amat nyukung sereta sedia deka besaup ngerembaika bantu sida, dikena ngamatka objektif kitai ke deka ngubah ekonomi nyadi ekonomi ti lebih tegap lalu ulih ngasilka penatai pemisi tinggi ke Sarawak enggau rayat.
“Lebuh ke berandau enggau sida (sektor peribit), sida nanya ke pasal pengelandik, lalu kami nerangka ngagai sida ke alai kitai nyendiaka modal mensia sereta nyikap sida ngena pengelandik ke diguna awakka ulih ngambi bagi ba pengawa ngemansangka digital ekonomi.
“Seiti pekara ke pemadu beguna dalam ekonomi digital tu iya nya siber sekuriti, analisis data enggau injiniring molekul, tu amat beguna ngagai biodiversiti kitai,” ku iya.
Abang Johari ti mega Menteri Wang enggau Perambu Ekonomi mansutka pekara nya dalam aum pengarang berita, pengudah ti berandau enggau raban sektor peribit bekaul enggau ekonomi digital, ke diatur ba Tingkat 2, Wisma Bapa Malaysia ditu, kemari.
Bejaku baru iya madahka software engineering mega amat beguna dalam atur pengawa deka ngubah ekonomi nuju ekonomi digital.
Nitihku iya, nya pekara baru sereta beperambu deka nyikap modal mensia dalam bidang nya.
“Berindik ari pekara tu, Yayasan Sarawak bisi nyendiaka bidang baru lalu meri latih, tu diungkupka lebih agi ngagai peranak Sarawak, dikena nangkup semua peminta guna kitai nuju sereta nyapai ekonomi digital,” ku iya.
Kelimpah ari nya dalam aum enggau sektor peribit nya, abang Johari mega madahka penumbuh Sarawak Multimedia Authority (SMA) deka dibantaika dalam aum kunsil nengeri (DUN) ti deka diatur dalam bulan November taun tu.
“Aku madahka sida iya, maya baum kunsil nengeri bulan November kitai deka meri kelala SMA ti ngadu tauka ngatur semua aktiviti enggau faktor ke ulih mai Sarawak jemah ila nuju ekonomi digital.
“Aku ngasaika sektor peribit amat gagit ati pasal ekonomi digital sereta sida iya besedia deka besaup sereta mantu kitai ngamatka nya (ekonomi digital),” ku iya.
Perintah nengeri nengah Abang Johari sereta sapit iya Datuk Amar Douglas Uggah embas enggau Ddagang enggau Datuk Amar Awang Tengah Ali Hasan: Sekretari Perintah Nengeri Tan Sri Datuk Amar Mohamad Morshidi Abdul Ghani, Menteri Wang Kedua Dato Sri Wong Soon Koh sereta 20 iku Senior Civil Servant kemari berandau ketuai dagang enggau industri bekaul enggau inisiatif Ekonomi Digital Perintah Sarawak kelimpah ari ngulihka timbal enggau input.hensif pasal 17 pekara.
Tujuh belas (17) bidang nya nyengkaum Undang-undang enggau Pemerintah; Perintah Digital; Data Digital; Cyber Security,Infrastruktur Digital; Betanam Betupi, Dagang Temuai, Pengerai, E-Dagang enggau Servis, Infrastruktur fizikal enggau utiliti, Pemansang Pengawa Berumah enggau Mengeri; Kampung Digital, Takah Digital Raban Bansa enggau ke bukai.