KOTA SAMARAHAN: Bantu ari Universiti Malaysia Sarawak (UNIMAS) diguna ba atur pengawa mansik baka ni grid ai ulih dikena di Sarawak.
Menteri Utiliti, Dato Sri Dr. Stephen Rundi Utom madah, nya berindik ari pansik tumu ke dipejalaika beberapa bulan ke udah deka begunaka ungkus belanja ti tinggi iya nya RM55 bilion.
“Aku deka meda bakani kitai ulih ngereja tu ngena chara ti lebih murah sereta bererenggat,” ku iya lebuh bejadika ‘Ceramah Teknologi Hijau’ di Unimas ditu, kemari.
Nitih ku Dr. Rundi, tuju grid ai nya dikena mutarka penanggul ai ke ditapi di kandang menua pesisir nengeri tu, ke agi bepanggai ba sistem graviti.
“Taja pan kitai bisi sungai enda ngira alai, kitai bisi ai berindik ari hari ke suah ujan enggau ke bukai tang agi bisi orang sebana pasal nadai ai beresi lebih agi sida ke diau di menua pesisir ti bepanggai ngagai sistem graviti, ke enda likun agi baka suba laban bisi ladang, balak enggau ke bukai.
“Diatu kurang tegap, ai sungai majak kamah lalu enda likun tauka enda manah agi ke pengerai baka suba lalu nya kebuah kitai patut meresi ai nya,” ku iya.
Nya alai, iya madahka beberapa inisiatif udah diasilka baka Bekal Ai Alternatif Sarawak (SAWAS) kelimpah ari nguji numbuhka loji kediri di kandang menua pesisir ngena chara ‘membran penapis’ enggau ke bukai.
Berebak enggau tu, Dr. Rundi madahka penanggul ke mega ditapi opis menteri iya nya bisi ai ukai asil (NRW) ti pemadu tinggi ketegal orang mayuh enda ngelimat ai ketegal kelalu murah.
“Enti tu majak nyadi, jemah ila engka rayat deka berebut ai di Sarawak, tang kitai berasai beterima kasih laban mayuh sungai, ujan enggau ke bukai,” ku iaya .
Sama bisi datai Sapit Mandal Cancelor (Akademik dan Antarabansa) Unimas Profesor Dr. Wan Hashim Wan Ibrahim.