BETONG: ‘Program Kembara Negaraku Sehati Sejiwa’ Renggat Bagi Menua Betong 2017 ke diatur begulai Opis Pemadah (JPEN) Betong enggau Opis Residen Betong lalu bekerejasama enggau opis perintah di bagi menua Betong sereta Gerempung Ukai Dikuasa Perintah (NGO) udah mujur diatur ti udah ngayanka penyiru ke menua Malaysia.
Bisi 24 buah entukar enggau 10 buah motosikal kuasa besai bela ngaul diri rambau atur program nya nengah pengawa ngena entukar bebala mayuh meleka ari Betong ngelawa Pelilih Pusa sebedau nampung pejalai ngagai Pelilih Kabong, udah nya pulai baru ke Saratok ngulu pengawa bejadi program tu.
Program ke diatur nyerumba ngintu Hari Merdeka ke-60 diintu taun tu dirichah enggau kaul ari mayuh bengkah opis perintah, bala kaban NGO enggau kelab motosikal kuasa besai, Betong Biker Motocycle Club (BBMC) kena Hari Enam tu tadi.
Bemacham aktiviti bela diatur piak pengatur ti nyambut penatai raban konvoi ti berengkah bejalai pukul 8.30 pagi, meleka ari opis kompleks perintah Nengeri Betong, ti udah dilepaska pengari Residen Betong Ivy Michel, ke mega nyereta raban nya.
Lebuhka ngetu enda lama di Pelilih Pusa, raban konvoi disambut sereta dirami di Sekula Sekondari (SMK) Pusa ke alai sida beperindang enggau pengawa patriotik dibai bala nembiak sekula nya, dikena meretika reti merdeka ke bendar.
Bala sida mega bela ngatur bemacham pekit nyerumba pengerami nya sereta pengawa nyuaka perais. Kelimpah ari kelai pengawa nyuaka tambai Jalur Gemilang ngagai bala pengari penerima di sitak Pusa.
Sebedau nampung pejalai napatka Pelilih Kabong, bala peserta Kembara Negaraku Sehati Sejiwa dirami enggau kelai ngelepaska pejalai dipenyadi pengari Pemesai Pelilih Pusa, Izzairul Jaafar.
Lebuhka datai di Kabong, sida sebuat disambut peranak diau besemak ke alai Kaban Kunsil Nengeri (ADUN) Kabong, Mohamad Chee Kadir, bela begulai ngerami raban nya.
Iya mega ngemai peranak diau besemak begulai meretika pengawa ngintu merdeka ti dirichah enggau pengawa nyuaka tambai ngagai pengari ketuai raban bansa enggau pedagang di sitak Kabong.
Palan dituju Kembara Negaraku Sehati Sejiwa ukai naka di Kabong, raban nya nampung pejalai ngagai Pelilih Saratok enggau tuju ngemai tambai Jalur Gemilang.
Sebedau nampung pejalai, Chee mega bisi bejadika kelai pengawa ngelepaska raban nya.
Pejalai Kembara Negaraku Sehati Sejiwa napatka Pelilih Saratok diterus ke alai konvoi tembu di Bagi Menua Betong lalu pengawa deka dipenyadika Kaban Parlimen (MP) P.205 Saratok, Tan Sri Dato Sri William Mawan Ikom.
Penatai sida sebuat di Saratok disambut naka pengerami ari Mawan enggau ADUN Kalaka, Datuk Abdul Wahab Aziz sereta bala komuniti diau besemak.
Ketuai raban, Azuel Abdullah nyuaka Jalur Gemilang ti dibai sepemanjai pejalai ari Betong lalu tu kelai tembu di Pelilih Saratok, ngemai reti chukup besai ngagai komuniti ditu meretika reti merdeka.
Kembara Negaraku Sehati Sejiwa Renggat Bagi Menua Betong 2017 tembu lalu pemujur iya meri semangat ngagai kitai terus meretika merdeka menua ti enda mudah lenyau ngapa ari ati peranak merdeka.