MIRI: Opis Menteri Pelajar Sarawak (KPS) patut ngemeratka pengawa meri bantu ngagai sekula bepenanggul ti dalam kategori Satu enggau Dua.
Chairman Gerempung Apai Indai enggau Pengajar (PIBG) Nasional Sarawak, Wan Zain Syed Mohdzar madahka pekara nya beguna endar dikena ngemanahka pemanah nama sekula di Sarawak.
“Endang enda ulih dikenggai bisi sekeda sekula bepenanggul di serata menua, tang perintah enda patut nejuka sekula tu pia aja, ari terus dikumbai bepenanggul,” ku iya madah ngagai Utusan Borneo kemari.
Ku iya, pengawa ngemanahka pemanah nama sekula bepenanggul tu patut chakah agi dipejalai ngambika bala komuniti enda mejah sekula nya.
“Anang semina ketegal seiti tauka dua sekula bepenanggul, komuniti terus ngumbai institusyen pelajar enda manah tang patut meri sukung ngemanahka nama sekula,” ku iya.
Semilan sekula ari Sarawak dalam Kategori Satu laban bisi penanggul disiplin, lalu sebuah dalam Kategori Dua, bekaul enggau isu dadah.
Bepelasarka lis nya, sekula tu besemak enggau endur ti bisi penanggul rama enggau penyalah nyadi.
Sepuluh buah sekula ari baruh pegai Opis Pelajar Pelilih Kuching, Padawan, Bau, Sri Aman, Miri, Baram, Lawas, Simunjan, Samarahan enggau Bintulu.
Ngelansa silik, bala pengajar enggau apai indai ku iya patut bejalaika tanggungpengawa begulai mantu bala nembiak ti bisi penanggul disiplin enggau dadah.
“Bala nembiak ti bepenanggul tu patut dibantu ngambika sida badu agi ngaul diri tauka nandu baru ulah ti sama tauka tepejuh begulai enggau bala bakih ke bukai,” ku iya.
Tu nyengkaum ngiri penemu ba jalai pengarap enggau pemanah ulah ti tau ngasuh ati sida siru, ngadaka kimpin ulih nempa modal mensia enggau ke bukai ti engkeman.
“Kitai enda nemu nama kebuah nembiak tu bepenanggul, nya alai, bala pengajar enggau apai indai patut ngaul diri semak ngambika nemu nama pun tauka kebuah ti nanggul sida,” ku iya nyimpul.