MIRI: Kunteriktor ke udah diberi peluang ngaga projek perintah dilalau ngambi bejalai sereta nembuka projek sida nitihka tipuh ti udah dilangkar, tauka pekara tu deka meri penusah ngagai komuniti di kandang menua nya nyema projek seruran ditangguh tauka diteju pia aja.
Menteri Muda Pemansang Orang Indu, Ruang Bilik enggau Nembiak Mit Rosey Yunus madah, tetiap kunteriktor patut nembuka projek tauka tinda ke udah diagihka ngagai sida sepengudah nerima kunterik laban semua projek ke diberi perintah iya nya ungkup pengelantang sereta pemaik rayat.
“Nyema kita enda tetembuka projek ke udah dikemendarka ngagai kita, tu deka meri pengerugi ngagai rayat laban perintah ngemendar sereta meri projek tu iya nya ungkup pengelantang sida.
“Pengawa kunteriktor ti smeina nejuka projek nya lalu enda ditembu nitihka timpuh ke udah dipelin, tu mih ketegal rayat deka pedis ati lalu terus nyalahka perintah ketegal projek ti enda siap nya,” ku iya.
Rosey madah munyi nya ngagai Utusan Borneo ditu kemari, pengudah ningaka sebana peranak Bekenu sentang sekeda projek di sitak nya ke enda tembu nitihka pelin.
Ku iya, endang udah nyadi tanggungpengawa kunteriktor nembuka projek nitihka pelin ke udah diberi, ketegal perintah endang begunaka perengkaguna nya ungkup guna rayat.
“Aku bisi dipadah peranak di Niah iya nya bisi seiti projek udah dilengkaka pia aja lalu kunteriktor nya enda ulih nembuka pengawa sida, ti ngasuh piak ke bekaul ngepunka baru projek nya lalu nyuaka ngagai kunteriktor bukai, ari empas nya projek tu deka tembu enda nitihka timpuh ke udah disemaya,” ku iya.
“Nangkan ke nya rayat lalu nyerahka pengari rayat sereta perintah bekaul pemuntan projek tu ti enda ulih tembu,” ku Rosey madah.
Beserimbai enggau nya, iya minta kunteriktor ti deka minta projek ngambika suah agi ngabas palan lalu mansik dulu projek nya, baka ni nya patut dipejalai sereta pekara ti patut dikemerat kena nentuka pejalai projek nya mujur, lalu nemu ungkus projek nya ke bendar, ukai nya semina ngengkahka rega projek nya sengapa, udah nya enda ulih ngerejaka projek nya ketegal salah kira bajet ti patut.
Dulu agi ari nya, Rosey nyadung Jalur Gemilang enggau tambai nengeri Sarawak ngagai Sekula Primari (SK) Kampung Selanyau di Bekenu, Sibuti kelai program opis menteri nya dikena nyeridi enggau nerenakka runding talukka menua ungkup sida nembiak rebak baru.
Ku iya, apai indai enggau pengajar patut ngemeranka runding talukka menua ngagai anak sida kenyau ari sida mit ngambika sida nemu enggau meretika penusah ti ditapi aki ini sida kelia ti ngujungka menua tu ulih megai kuasa kediri empu.
Beserimba enggau nya, iya madah, endang nyadi tanggungpengawa pengajar ngiri penemu ngagai nembiak di sekula primari enggau pra-sekula bekaul reti merdeka tauka pemesai reti sebuah menua ti ulih megai kuasa kediri ngagai sida.
“Nengah runding ti nemu pemesai reti merdeka, raban nembiak rebak baru nemu baka ni ketuai menua kelia udh bebendar ngetanka menua sereta nengeri sida,” ku iya nambah.
Jalur Gemilang enggau tambai nengeri Sarawak nya udah disadung raban Biro Tata Negara (BTN) enggau Opis Pengelikun Menua (MKN).
Sama bisi iya nya Kaban Parlimen (MP) Sibuti Ahmad Lai Bujang enggau Pemesai Pelilih Bekenu Husseni Bakir.