Anda di sini

Seminar Sains Lumba 2017 deka diatur 10 -12 Oktober

KUCHING: Bisi 298 iku pengari ari Malaysia enggau menua bukai deka begempuru di Kuching ngulu ‘Coaching and Sports Administration Symposium’ nengah atur Seminar Sains Lumba 2017 ti diatur berengkah ari 10 ngagai 12 Oktober di Riverside Majestic.

Seminar tu diatur begulai Opis Menteri Dagang Temuai, Seni, Main Asal, Nembiak enggau Lumba, enggau kerejasama ari Kaunsil Lumba Sarawak, Institut Lumba Nasional (ISN), Universiti Teknologi Mara (UiTM) enggau Palan Pematih Pengajar Tun Abdul Razak (IPGTAR).

Nitihka Menteri Muda Nembiak enggau Lumba, Snowdan Lawan, seminar nya berambaika jaku ‘The Key to Podium Excellence and Athletics Performance Through the Application of Sports Science’.

Seminar tu nyadi pelasar pemadu efisyen dikena ngemansangka penemu ngagai bala koordinator lumba, menijar lumba, pengajar sereta pengelicha ti ngaul diri ba lumba.

Berebak enggau nya, bala pesereta mega ulih betukar penemu ba isu atur teknikal lumba, seraya meretika komitmen perintah deka nempa Sarawak nyadi palan lumba,” ku Snowdan dalam aum pengarang berita mantaika pekara nya di Stadium Nengeri ensanus.

Ku Snowdan nerang silik, dikearap asil ari seminar tu deka nempa kerejasam enggau kaul kereja manah agi nengah strategi kunsi gawa, sereta pemesai lumba nengeri deka disikap ngena penemu ti manah agi ba isu bekaul.

Kami mega ngarapka seminar tu deka nyadi peransang nempa Sarawak nyadi palan bukai ti ditapat ungkup atur lumba antarabansa dudi hari,” ku iya nambah.

Sekeda ari keretas kereja ti deka dibantaika iya nya ‘Sports Science: The Winning Edge in Coaching’ ari Professor Dr Tengku Fadillah enggau ‘An Overview of National Sports Institute Podium Programme’ ari Timothy O’Brien.

Seminar tu mega deka bejuraika ba renggat baruh ti ulih nempa ke penyulut manggai ba podium, pengawa ketuai sereta ngatur pengawa dalam lumba.

Sama bisi datai kemari Ketuai Pemesai Eksekutif SSC Dr Ong Kong Swee enggau Chairman ISN Dr K.H Tan.