Anda di sini

Gaga surat berita mandang pemujur nyadika peransang

Nanta: SDNU Sibu dilalau ngaga surat berita nyadika peransang nembiak sekula nunda pemujur pangan diri

SIBU: Pengeransing deka ngembing nembiak nitihka singkang orang bukai ti udah mujur tau dipunka ba bala nembiak ke benung ba sekula primari tauka sekondri.

Sapit Menteri Pemansang Menua Pesisir enggau Kandang Menua (KKLW) Datuk Alexander Nanta Linggi madah, ambika banding Gerempung Dayak Sarawak (SDNU) Sibu tau berundingka chara ngaga surat berita diri empu ti disempulangka enggau gambar sida ke udah mujur ba pelajar.

Ku iya, surat berita tu disadung ngagai bala raban lalu deka dibacha bala anak ti benung besekula.

Kelimpah pekara ti bekaul ke bukai, ba dua tiga lambar surat berita tu, tau gagaka seiti awak alai kita nyimpan gambar nembiak ke udah mujur ba pelajar tauka iya ke udah mujur nampung pelajar ba universiti.

Ari nya, nembiak tauka anak kita maya tepedaka gambar baka tu sida deka bulih peransang sereta tau nerenakka juluk ati deka nunda orang ke udah mujur ba pelajar,” pia ku iya madah.

Iya bekunsika penemu tu maya ngulu Pengerami Diri Sebilik SDNU Pampang Sibu di Taman Tasik Permai ditu, kemari.

Pengerami tu bela digulu Sekretari Politik Kepala Menteri Romeo Christopher Tegong, Chairman SDNU Pampang Sibu Chambai Lindong, Temenggong Stanley Geramong, Pemancha James Semilan enggau Chairman Komiti Pengerami Sammy Dennis.

Nanta ti mega Sapit Presiden SDNU maya tu madahka raban gerempung tu bela patut ngembing raban nembiak nengah chara rekreasyen, chara ti udah dikelala perintah chara ti engkeman dikena ngembing raban nembiak.

Ba KKLW, kitai mega bisi program ke sebaka ti lebih ngemeratka raban nembiak menua pesisir.

Nya alai, SDNU baka di Sibu bela tau ngatur program rekreasyen baka pekit futsal laban tu seiti platform ke manah dikena kitai ngembing sida,” ku iya sambil besemaya iya deka nyaup SDNU Sibu ngatur program bekaul enggau raban nembiak.

Nambahka nya, Nanta bela beratika orang indu dalam gerempung nya deka disaup ngambika ulih ngatur program bekaul enggau orang indu.

Ba penemu iya, raban nya tau ngepunka program sida baka ngaga program licha pengidup tauka licha bekaul enggau dagang.

Dikena ngelai nyukung pengawa SDNU Sibu iya besemaya deka meri bantu RM10,000 dikena nandu pengawa meri peransang pelajar ngagai nembiak ke udah mujur ba peresa, RM5,000 dikena ngatur program bekaul enggau raban nembiak enggau RM5,000 diungkupka ngagai program orang indu.