Anda di sini

Pekit tenis diatur SLTA nyaup ngelaku dagang temuai di nengeri tu: Karim

Advertisement

KUCHING: Pekit tenis ke diatur Sarawak Lawn Tennis Association (SLTA) dalam timpuh betaun ke udah nyaup ngelaku dagang temuai di nengeri tu.

Menteri Dagang Temuai, Nembiak, Seni, Main Asal enggau Lumba Datuk Abdul Karim Rahman Hamzah madah, SLTA udah mujur mai beratus iku pemain tenis baikka nya ari dalam enggau luar tama ke Sarawak.

“Atur tu nyadi seiti agi chara kitai ngangkatka lumba enggau main nyadi seiti agi bengkah dagang temuai.

“Kelimpah ari nya kitai deka ngangkatka Sarawak nyadi kuasa besai dalam lumba enggau main.

“Maya kitai bisi ngatur pekit, mayuh pemain ari menua luar datai ke Sarawak lalu tu nyaup ngelaku nengeri kitai sereta menua Malaysia,”ku iya.

Abdul Karim mansutka jaku nya ba aum pengarang berita pengudah nerima penemuai raban SLTA di Begunan Baitulmakmur ditu, kemari.

Raban SLTA diuluka Presiden Dato Patrick Liew ke alai sida seraban bisi madahka tusun program ke deka diatur SLTA berengkah ba bulan September nyentuk November 2017 tu.

Ngenang kaul ke sama, Abdul Karim madah nyauka ninting bulan Sarawak bisi ngatur pekit tauka pengawa ke besai kelebih agi di Mengeri Kuching.

Ku iya, pekit ke bisi diatur ngujungka hotel di kandang Mengeri Kuching penuh endur temuai bemalam.

Pekit ke bisi diatur SLTA iya nya ‘12th ATF Asian 14/U Series’ berengkah 13 nyentuk 17 September ke deka dipasuk 100 iku pemain ari 13 bengkah menua.

Ditangkanka enggau pekit  ‘30th Sarawak Chief Minister Cup (II) ITF Junior Circuit (Grade 3)’ berengkah 10 nyentuk  15 Oktober lalu dipasuk urung 250 iku pemain ari 25 bengkah menua.

Udah nya SLTA deka ngatur pekit ‘ITF Men’s Professional Circuit USD 15,000.00’ berengkah 16 nyentuk 22 Oktober ti dipasuk 80 iku pemain ari 15 bengkah menua.

Pekit ‘Genting Tennis Malaysia National Circuit - Sarawak Open 2017’ deka diatur berengkah 8 nyentuk 12 November lalu dipasuk pemain ari 7 bengkah menua.

Advertisement