Bepelasarka isu sereta pansik JPNIN rikod IKM ba Sarawak majak manah dibanding taun nyin kemari
KUCHING: Rikod ‘Indeks Ketegangan Masyarakat’ (IKM) ba Sarawak taun tu majak manah tauka bisi nurun dibandingka taun nyin kemari.
Direktor Opis Penyerakup enggau Integrasyen Menua (JPNIN) Pampang Sarawak, Dirwana Azool madahka, pengelantang enggau pemaik nengeri tu ke diuan pupu bansa enggau jalai pengarap, udah ngayanka ba tikas ti manah.
Nitihku iya IKM nya bepelasarka isu ke bisi diripotka nyadi di nengeri lalu dipansik opis JPNIN sereta asil ripot dianjung ngagai Komiti Pengelikun.
“Bekaul enggau IKM Sarawak, (rikod) kitai enda kelalu tinggi enda mega kelalu baruh. Kitai ba tikas ke lantang tauka dalam pemaik.
“Taun nyin kemari laban bisi pengawa bepilih diatur, bisi sekeda piak ke bisi tanggung pengawa tauka nadai tanggungpengawa mantaika isu lalu isu nya dipansik, maya nya suba bisi tinggi (IKM) tang diatu tikas nya udah nurun.
“Tikas indeks kitai diatu ngayanka kitai ba tikas komuniti ‘madani’(civil society),” ku iya ti enda meri penerang silik bekaul enggau IKM Sarawak.
Driwana meri penerang nya lebuh dikerandau dalam aum pengarang berita pengudah ke nerima penemuai rasmi Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit, Datuk Fatimah abdullah ngagai opis JPNIN, kemari.
JPNIN udah ngemansangka seiti instrument pansik nengah sistem pengeriput enggau mansik data pengeriput ungkup nentuka tikas kaul entara pupu bansa di Malaysia.
Instrument nya diberi nama Indeks Perhubungan Masyarakat (IPM) enggau IKM. JPNIN ngena IPM dikena ngiga tikas pengelantang enggau pemaik nengeri enggau menua.
Lebuh ditanya sekalika penyadi penyakit ukui gila ke benung nyadi di nengeri tu dipasukka dalam IKM, Dirwana madahka penyakit rabies nya ukai isu tang bekaul enggau pengerai.
Kelimpah ari nya, Fatimah dalam aum pengarang berita ke sama madahka diri temegah ati meda program ke diatur JPNIN baka Rukun Tetangga (RT) enggau Skim Rondaan Sukarela (SRS) ti mekuh ngagai pengelikun raban bansa nengeri tu.
“Di Sarawak komiti tu (RT) renggat raban bansa ulih mantu dalam pekara ti bekaul enggau pengelikun dalam raban bansa kelimpah ari ke ulih nyadi mata enggau pending kitai (opis menteri).
“SRS ke ditumbuhka ba renggat raban bansa endang dikena ngenukuka pengelikun peranak laban kitai enda ulih enti semina ngarap tauka bepanggai ngagai raban polis aja,” ku iya.
Nitihku Fatimah naka ke diatu di Sarawak bisi 958 RT enggau 473 SRS.
Sama bisi datai, Menteri Muda Orang Indu enggau Pemansang Nembiak Mit Rosey Yunus, Sapit Direktor JPNIN Esther Dingkawan enggau kebukai.