KAPIT: Polis Kapit udah nyain Sempekat Nulak Makai Suap rambau pengawa macha sumpai nadai makai suap PDRM Indu Opis Polis Pelilih (IPD) Kapit ti dikemataka dua iku pemesai Komiti Nagang Pengawa Makai Suap Malaysia (SPRM), Dzulkarnain Rousan enggau Mohamad Nazif, ditu, apin lama ke udah.
Pengawa pagi Hari Satu ti diatur di Balai Mayuh Guna IPD Kapit ditu diuluka OCPD Kapit, DSP Freddy Bian.
Sekeda bala pemesai kanan polis ke bisi ngangkat sumpah iya nya Pemesai CID ASP Markaranu Beddu, Pemesai Special Branch ASP Chua Su Hua, Pemesai Narkotik ASP Jawie Hamata sereta Pemesai Gerah Mensia Mayuh enggau Trafik ASP Fauzan Kassim.
Dalam jaku dipansutka iya, Freddy nerangka PDRM nyadi ejensi keterubah dalam Opis Menteri Kaunsil Kandang Menua (KDN) nyain Sempekat Nulak Makai Suap ari serata nengeri, kemari.
Bisi urung 160 buah IPD di serata menua.
“Pengawa ngangkat sumpah diatur dalam bulan Januari 2017.
Semua renggat enggau kaban IPD dipinta ngangkat sumpah lalu nyain sempekat.
“Batang tuju pengawa tu nyeliahka diri ari salah guna kuasa enggau penyalah makai suap, raban polis ngemeranka tikas disiplin pemadu tinggi enggau tanggungpengawa maya bejalaika tanggungpengawa sida.
Raban polis meseti bisi integriti ngelaungka diri ari ngereja penyalah,” ku Freddy.
Nangkan nya, ku iya, ulah makai suap meseti dipunas nentuka endur gawa bibas ari pengawa makai suap.
Raban polis meseti ngayanka integriti enggau semangat profesional ti tinggi.
“Nya kebuah kitai sehari tu (kemari) ngangkat sumpah lalu nyain sempekat, udah tu ila ngulu kus enggau workshop sereta sebarang penyalah betapi enggau ukum (undang-undang),” ku Freddy nyematak.
“Polis ngetuaika ejensi ti ngetanka pengelikun, atur enggau ngintu pengelikun dalam menua. Raban polis maya bejalaika tanggungpengawa betapi enggau pemar ti majak nambah.
“Nya alai sida meseti bisi disiplin ti manah enggau ulah menua sereta integriti. Sebarang ‘pengilap’ – semina seiku tauka dua dalam raban nya deka ngamahka nama PDRM.
“Anang sesekali beambi ulih ba kuasa ungkup penguntung diri empu. Pegai sempekat tu,” ku Freddy nyimpul.
Sama bisi bejaku Pemesai SPRM, Dzulkarnain Rousan.