Anda di sini

Polisi perintah besai ngelaungka peranak Malaysia ari TTx disukung

Advertisement

KUCHING: Polisi perintah besai ti ngelaungka peranak Malaysia ari mayar Chukai Dagang Temuai (TTx) endang betul sereta ngayanka bisi pengibuh lalu nerima runding rayat.

Menteri Dagang Temuai, Seni, Main Asal, Nembiak enggau Lumba, Datuk Abdul Karim Rahman Hamzah madahka, nya endang pekara ti dikearapka kenyau maya ngepunka perambu deka bejalaika TTx, iya nya ngulihka buah runding tauka penemu pengemeran industri sereta mansik dulu menua bukai ke bisi chukai nya.

Kitai meri terima kasih ngagai perintah enggau Menteri Dagang Temuai enggau Main Asal laban ti udah beratka penemu tauka runding rayat lalu nya seiti berita manah ngagai rayat Malaysia.

Penyampau RM10 (TTx) ungkup temuai menua tasik ke diau ba enda ngira bagi hotel betikas satu ngagai lima bintang, penyampau nya mimit,” ku iya ba sebengkah aum pengarang berita ditu, malam ensanus.

Nambaka nya Abdul Karim madahka penyampau nya mimit aja enti ditukar ngagai mata duit sida (menua tasik), ambika chunto RM10 ditukar ngagai dolar Amerika Syarikat semina USD2.

Tang ku iya bekaul enggau penyampau ke digumpul, iya ngarapka ulih digumpul nitihka pupu rata ti manah sereta dikena ngelakuka dagang temuai.

Ditanya pasal penyikap Sarawak ba atur pengawa bejalaika Chukai Dagang Temuai, Abdul Karim madahka nya hak perintah besai deka minta chukai lalu ejensi ke megai tanggungpengawa iya nya Opis Kastam.

Perambu atur deka bejalaika chukai seruran berubah lalu aku ngarapka ke sekali tu pemutus udah ditetapka laban kitai enggai nambahka tating pengidup rayat ti udah kena Chukai Barang enggau Servis (GST),” ku iya.

Kelimpah ari nya, Hari Tiga (Rabu) nyin tadi, Menteri Dagang Temuai enggau Main Asal, Datuk Seri Mohamed Nazri Aziz madahka, rayat Malaysia enda kena bungkur chukai dagang temuai lebuh chukai nya dipejalaika ila.

Nitihku iya, pemutus nya digaga perintah pengudah ngambi timbal ari mayuh piak.

Perintah udah ngemutusaka iya nya ngambika chuaki dagang temuai enda mungkur rayat Malaysia ti diau bemalam ba semua bansa premis endur diau, iya nya ari lima bintang ngagai ke nadai bintang lalu tu ngayanka perintah ibuhka pengirau rayat, lebih agi ti bepenatai pemisi baruh enggau tengan,” ku Nazri.

Bekaul enggau isu bukai, Abdul Karim madahka opis menteri besedia betapi enggau enda ngira nama empas ke nyadi ngagai industri dagang temuai ketegal penyadi penusah penyakit rabies di Sarawak.

Taja pia ku iya, naka ke diatu igi penyakit nya agi ulih dijaga sereta enda ngerekai di menua tasik tauka rantau tu.

Aku ngasaika nya enda kelalu ngerembai ke menua tasik tauka rantau tu ke lalu nyadi epidemik ti ngenakutka temuai ke datai enggau aku ngasaika nya nadai meri empas mayuh laban kes ti baka tu iya lokaliti ba sekeda endur aja,” ku iya.

Ku iya nama ke pemadu beguna diatu iya ngarapka igi penyakit nya ulih dijaga sereta enda ngerekai kelalu jauh kelimpah ari ngarapka nadai kes baru ke nyadi ba mensia.

Advertisement