Anda di sini

Simoi: Anang ngangkaika sentimen bansa, jaga basa enggau pangan diri

Advertisement
 Simoi (tengah) benung manduk ‘rendang’ seraya dikemataka Ismawie (tiga kanan), Hamdan (dua kanan), Jamahari (kanan), Abang Bohari (kiba) sereta bala bukai maya bejadika pengerami nya.
PENGINGAT AIDILFITRI: Simoi (tengah) benung manduk ‘rendang’ seraya dikemataka Ismawie (tiga kanan), Hamdan (dua kanan), Jamahari (kanan), Abang Bohari (kiba) sereta bala bukai maya bejadika pengerami nya.

SRI AMAN: Kaban Kunsil Nengeri (ADUN) Lingga, Simoi Peri ngelalau rayat di nengeri tu anang ngangkaika sentimen sesebengkah bansa tang patut bebasaka pangan diri sereta meretika adat enggau pengarap bansa bukai dikena ngenegapka agi penyerakup ke endang dikemeranka ditu.

Nitih ku iya, enti bisi ulah seruran bebasaka pengarap sereta adat bansa bukai, tentu nengeri enggau menua tu deka terus lantang nadai penyarut enggau pangan diri.

Nama utai ti dikearap ngambika isu bekaul enggau bansa enda diangkai laban nya ulih ngeruga pengelantang enggau pengelikun menua kitai tu,” ku iya.

Simoi madah munyi nya rambau bejadika pengerami ‘Ramah Tamah’ Aidilfitri diatur Palan Servis Komuniti DUN Lingga bepalan ba Laman Dataran Pekan Lingga ditu, kemari.

Ku iya mega, nengeri Sarawak udah ngasaika buah merdeka lebih 50 taun dalam Malaysia, nya alai penyerakup bansa di nengeri tu patut dijaga manah laban tu chukup tegap sereta nerima puji ba serata dunya.

Semua tu asil ari iring ketuai menua kitai ke seruran berunding jalai pemadu manah nempa rayat ba menua enggau nengeri tu ngetanka penyerakup,” ku iya.

Berebak enggau nya, iya mega ngarapka isu-isu bekaul enggau sentimen pengarap patut diputar enggau manah ngambika enda ngujungka laya, penyerakup enggau beserekang penemu enggau pangan diri,” ku nerang nyemetak.

Sama bisi datai, Pemesai Opis Kunsil Sri Aman, Ismawie Salleh, Pemantu Pemesai Opis Kunsil, Hamdan Katang, Temenggong Abang Bohari Abang Zen sereta Penghulu Jamahari Edi.

Pengerami nya dirichahka enggau pengawa beperindang enggau lagu-lagu sereta enchabut tiket benasut.

Advertisement