KUCHING: Sarawak enggau naka ulih deka ngubah sosio-ekonomi nengeri tu nuju sebuah ekonomi digital (DE), ke nyadi sebagi ari pemerat strategi ngenyampatka bungkur DE di nengeri dalam kandang beberapa taun ke deka datai berengkah ari diatu.
Menteri E-Dagang, Dato Sri Wong Soon Koh madahka dalam beberapa taun tu ke udah, Sarawak udah ngaga mayuh macham strategi sereta program pemansang dikena ngenyampatka pemansang sosio-ekonomi nengeri tu.
“Diatu, Sarawak benung ngaga strategi baru sereta program ngenyampatka ubah sosio-ekonomi nengeri tu.
“Entara pekara dikemerat, iya nya ngemansangka kapasiti orang dagang Sarawak ngambika sida tegap agi ngubah sosio-ekonomi Sarawak dalam kandang berapa taun tu ila,” ku Wong.
Iya madah munyi tu lebuh bejaku bejadika licha pasal ‘Technopreneurship: Silicon Valley Innovation Ecosystem, and How, and Why Entrepreneurship, Intrapreneurship (Corporate Internal Incubators) and the Startup Ecosystem in the Silicon Valley Works’ ti di atur Angkatan Zaman Mansang (AZAM) enggau Opis Kedutaan US bepalan di Kuala Lumpur ditu, kemari.
Ku iya, pejalai Sarawak dalam nyapai sebuah menua ke ngembuan ekonomi ke ngembuan pemisi ke besai sereta kualiti pengelantang pendiau ke manah agi, agi jauh endar.
“Ketegal tu mih perintah meransang orang dagang sereta industri majak ngaul diri ba teknologi sereta penemu intensif.
“Kitai enda tau enda nemu pasal pemansang sereta dinamik dagang ba tikas global, ambika chunto baka ekonomi China ke majak besai sereta sebuah menua ke megai kuasa dagang dunya kemaya hari tu, sereta empas ari nya ba menua kitai empu,” ku iya.
Wong ti mega Menteri Kedua Wang menua tu madahka bisi pemerat ba industri dagang nengeri tu ngembuan penemu ke inovatif, besemekih sereta ngemansangka diri napi gaya ekonomi global ke majak mar.
“Mayuh ari nembiak kitai di menua bisi pengerindu nampung pelajar dalam bidang teknologi. Ba sida nembiak, tu mih dunya ke bendar. Enti kitai beratika bala nembiak diatu, sigi enda tinggal rengka ‘gadget’ ari jari sida iya. Sida iya beratika utai ti nyadi dalam dunya tu enggau jampat ketegal teknologi,” ku iya.
Pemansang ekonomi digital pan nyau udah nambah dikerembaika di menua tu, baka ke sebut Kepala Menteri Datuk Amar Abang Johari Tun Openg maya konferens IDECS (International ICT Infrastructure & Digital Economy Conference Sarawak) bedau lama tu tadi.
“Sarawak begunaka strategi baru ba pengawa ngemansangka perengka guna ICT ke ulih napi Ekonomi Digital.
“Lalu baka nya mega pengawa dagang teknologi ba bala nembiak di menua tu ke enda tau enda dikemanahka agi, ke alai naka ke diatu, menua tu agi kurang endar orang tauka nembiak ke bebendar ngemeranka ‘technopreneurship’ enggau ‘entreprenurship’,” ku iya.
Ba pemansang digital ekonomi, bisi sekeda palan perengka guna ekonomi digital ke ulih alai bala nembiak ke deka ngereja dagang teknologi, mantu sida iya ngepunka dagang nya nengah polisi sereta program ti bisi disediaka perintah besai enggau nengeri nyengkaum nyendiaka insentif enggau skim duit jali baka Teraju, Superb, aktiviti UPUIH ari Opis Kepala Menteri.
Ke bukai nyengkaum (inisiatif pemansang orang dagang) ti bisi disediaka ejensi sereta gerempung bukai baka SEDC, Malaysian Global Innovation and Creativity Centre (MaGIC), Borneo 744 enggau iCube.
“Baka E-Com Y30 dikearap ulih ngemansangka pengelandik nembiak di menua pesisir enggau di mengeri laban technopreneurship bisi nyendia pengawa ke nembiak dalam bidang digital, ngangkatka inovasyen digital sereta kreativiti, ngemansangka pengulih dikena ngemanahka agi ekonomi digital sereta nyendiaka sukung polisi ngagai nembiak dalam ekonomi digital,” ku iya.
Perambu Transformesyen E-Commerce (E-Com Y30) dipunka Abang Johari maya konferens IDECS tu tadi.