Anda di sini

Projek Ngangkatka Tikas Prestasi Sekula 1MSAC mujur

 Bala nembiak enggau pengajar begambar kenang begulai enggau Salang sepenembu pengerami nya.
NGEMERATKA PELAJAR: Bala nembiak enggau pengajar begambar kenang begulai enggau Salang sepenembu pengerami nya.

JULAU: Projek Ngangkatka Tikas Prestasi Sekula ti dipejalaika Kaunsil Penyanding Penemu Sarawak 1Malaysia (1MSAC) mujur nyaup tiga buah sekula di Julau nambahka peratus nembiak pas ba Ujian Penilaian Sekolah Rendah (UPSR) taun seiti nyin tadi.

Chairman 1MSAC Datuk Joseph Salang Gandum madah, projek nya berengkah dipejalaika ari taun 2016 lalu deka tembu taun 2018.

Iya madah, keterubah projek nya digaga, semina tiga buah sekula aja dipilih iya nya Sekula Primari (SK) Nanga Dayu, SK Nanga Kara enggau SK Nanga Kota.

Ba pemutus UPSR 2016, aku berasai amat gaga laban tiga buah sekula ke dipilih tu, kelebih agi baka SK Nanga Kota mujur nambahka peratus pas ari 38 peratus ngagai 100 peratus.

Pia mega baka SK Nanga Dayu enggau SK Nanga Kara ti bela nambah 19 peratus enggau tiga peratus,” pia ku iya madah.

Iya mantaika pekara nya maya Pengerami Nyuaka Setipikit Woksyop UPSR iM Sarawak 2017 ba SK Nanga Dayu, Julau, empai lama tu tadi.

Madah enggau silik Salang ti mega Kaban Parlimen (MP) Julau madah, projek ke digaga nya inisiatif ari baruh pekara pelajar.

Ku iya, tuju projek nya digaga dikena ngangkatka tikas prestasi sekula ba pemutus pelajar nembiak kelebih agi baka subjek Jaku English, Jaku Malaysia, Matematik enggau Sains nyapai tuju nambahka peratus pas UPSR.

Kitai andal amat Projek Ngangkatka Tikas Prestasi Sekula tu deka nyadika menalan alai bala pengajar bekunsika penemu enggau pengelandik besaup ngangkatka prestasi sekula diri empu.

Pemujur projek tu mega bela bepun ari kerejasama piak Opis Pelajar Nengeri, Opis Pelajar Pelilih Julau, bala pengajar enggau bala apai indai nembiak,” ku iya madah baru.

Bekenangka woksyop ke diatur iM Sarawak nya, Salang madahka woksyop nya renggat kedua udah digaga.

Iya madah, iM Sarawak bela nyaup sekula nyediaka gaya belajar enggau ngajar ti lebih lantang enggau chara nyikap perengka guna baka kereban ngajar, kereban bacha enggau bup malin, projektor enggau laptop tauka perengka bekaul ke bukai.

Nya alai, woksyop baka tu mega diatur laban tu seiti ari chara nyaup bala nembiak enggau pengajar sekula.

Woksyop tu ngembuan tuju deka mandangka chara ngajar ti engkeman agi sereta ulih nemu enggau silik teknik sereta strategi nyaut peresa,” pia ku iya nerang.

Berindik ari pekara nya, Salang ngarapka woksyop ke diatur serak tu bela nempa pemujur ba bala nembiak Primari 6 ke ngambi UPSR taun tu.

Woksyop tu digulu 60 iku nembiak Primari 5 enggau Primari 6 ari tiga buah sekula nya.

Sama bela datai maya pengerami tu iya nya Pemantu Ketuai Pemesai Opis Pelajar Julau Wong Makus, Kepala Pengajar SK Nanga Dayu Juna Jelani, Kepala Pengajar SK Nanga Kara Anthony Thambi enggau Kepala Pengajar SK Nanga Kota Ambah Tandang.