KUCHING: Rayat Sarawak endang untung ketegal penyerakup di menua tu enti dibanding enggau menua bukai, bisi basa ke pangan diri enda ngira bansa tauka pengarap, nyengkaum bela ngintu hari besai sesebengkah bansa.
Menteri ba Opis Menteri Besai, Dato Sri Nancy Shukri madah kitai rayat Sarawak patut beterima kasih laban di Sarawak kitai nelap sereta bebasaka pangan diri.
“Lalu seharitu, lebuh kitai agi nyambut Ramah Tamah Hari Raya Aidilfitri di sitak N.13 Batu Kitang, enda ibuh ba dewan pan kitai ngaga atur pengawa tu, ba ditu aja (endur atur pengawa nya dipun) udah chukup manah.
“Kebuah aku bejaku munyi nya, laban tu mesgit, lalu ukai semina orang Islam aja ke kitu berami enggau kitai tang sida ke ukai Islam pan sama ulih enggau kitai berami.
“Gaya bansa tu ke patut alai kitai beterima kasih, laban di Sarawak kitai sigi bebasaka pangan diri, lalu ngaga atur pengawa tu di luar mesgit, siti chara tauka gaya endur orag Islam besembiang, tang kitai mai bala pangan kitai ari pupu bansa bukai sereta pengarap ukai Islam beratika chara kitai,” ku Nancy.
Iya madah munyi nya lebuh bejaku bejadika pengerami ‘Ramah Tamah Aidilfitri’ PBB pampang Batu Kitang ba laman Mesgit Darul Ihsan di Kpg Haji Baki ditu, kemari.
Ba lansa bukai, Nancy ti mega nyadi Kaban Parlimen (MP) Batang Sadong madahka komunit Dayak baru udah nyambut Hari Gawai Dayak, lalu bala kitai pan ku iya, mayuh udah enggau ngerami pengawa ngiling tikai di sekeda genturung pendiau Dayak.
“Kitai ulih beratika penyerakup kita di Sarawak tu, lalu kediatu, penyerakup entara kitai pan makin tegap laban nya pemerat sereta peneka kitai empu, ngaga endur tu nyadi palan mayuh macham pupu bansa sereta pengarap betemu, kelimpah ari negapka agi kaul kitai,” ku iya.
Sama bisi datai Menteri Kaunsil Kandang Menua enggau Pengawa Berumah Datuk Prof. Dr. Sim Kui Hian, enggau Ketuai Ranting PBB Batu Kawah, Dato Ahmad Ibrahim.