KUCHING: Surat perintah rasmi ari opis Pengerijista Gerempung (RoS) ungkup Parti Tindakan Demokratik (DAP) ngadu pengawa bepilih dalam parti deka dipansut enda lama agi.
Sapit Menteri Dalam Menua Datuk Masir Kujat madah surat nya deka dianjung ngagai DAP ba minggu tu tauka ba minggu ti deka datai.
“DAP enda ulih ngadu aum endur milih komiti baru enti nadai surat perintah rasmi ari RoS.
“Ba runding aku, enti sida enda nerima surat ari RoS, sida enda ulih ngadu CEC.
“Ngarapka surat nya diberi ngagai DAP ba minggu tu tauka ba minggu ti deka datai,”ku iya lebuh dikerandau pengudah ngulu Aum Supreme Kunsil PRS ditu, kemari.
Masir nambah enggai bejurai panjai sentang pekara ketegal ti diasaika kelalu sensitif.
Iya madah Sapit Menetri Besai ke mega Menteri Dalam Menua Datuk Seri Ahmad Zahid Hamidi udah dulu bejuraika pekara nya.