Kemeranka ekonomi digital laban nya ulih ngangkatka Sarawak nyadi menua ti pemadu maju di M’sia
LAWAS: Sarawak majak mansang ke mua nengah chara holistik sereta mekuhka ekonomi digital jemah ila nengah sukung industri ari United States.
Sapit Kepala Menteri ke mega Menteri Industri enggau Pemansang Orang Dagang, Datuk Amar Awang Tengah Ali Hasan madahka tu deka ngangkatka Sarawak nyadi sebuah nengeri ke maju dalam menua tu.
“ Ekonomi digital nya enda tau enda lalu kitai enda tau enda ngemeranka nya enggau penuh ati lalu pengawa industri nya siti ari chara kitai nyingkang ke mua seraya ngangkatka ekonomi, “ ku iya lebuh bejadi Pengerami Ngiling Bidai Gawai Dayak Lawas, ti diatur ba Hotel Seri Malaysia kena malam hari Dua tu tadi.
Kededua pekara nya begunaka pengereja ti chukup pandai sereta dilatih, ke alai nengeri diatu ngemeratka pekara nya.
Ku iya, kelimpah ari nya industri mit enggau jelan pemesai di nengeri tu mega dikemerat ngambika ulih nguna jalai pemasut ke chukup mayuh, nyengkaum di Lawas ditu ke bisi pontesial ngemansangka mayuh agi industri kotej.
Iya mega bisi nyebut pasal komuniti Lun Bawang majak mansang nengah pengawa ngaga marik enggau industri kotej di Lawas.
“ Sida bepun ari mit lalu nempa nama ke produk sida ngelui ari nengerif Sarawak lalu tebilang di nengeri bukai di menua tu ,” ku iya.
Awang Tengah, ke mega Menteri Kedua Pemansang Mengeri Enggau Pengeraja Asal madah, perintah seruran sedia mantu meri lalau, sukung ari sukut belanja enggau bukai ngagai sesapa ke bisi ati nyereta industri kotej.
Berebak enggau nya, iya madahka MP Lawas ke mega Sapit Menteri Pekara bebeli Barang enggau Penguna Datuk Henry Sum Agong Datuk Henry Sum Agong endang bebendar mantu pengundi ba sitak iya di Lawas.
“ Rayat ditu benasit amat laban bisi iya nyadi MP kitai ke mega nyasi sapit menteri ti ngaul kitai enggau perintah besai, “ ku iya.
Ku iya, MP ngembuan rikod ke manah ngintu pengundi ditu enda ngira bansa, sereta bekerejasama enggau iya nyeliahka ari enda ampit ungkup belanja sereta ngelala penanggul lebuh ke mantu rayat.
“ Aku arapka lebuh datai ba maya ke patut, rayat meri sukung penuh ngagai iya” ku Tengah.
Dulu ari nya, Henry lebuh ke bejaku madahka mayuh bengkah pemansang projek infrastruktur baka Ba kelalan CIQ, Sepital Lawas Hospital enggau ke bukai benung digaga.
Ku iya,Opis Pelilih Lawas udah diungkupka geran RM 2.5 milion dikena ngemanah enggau ngaga begunan jalai pengarap taun tu, taja pan bebida penyampau tang manggai RM 50,000 ke sesebuah.
Sama bisi datai, chairman BNBBC ke mega Kaban Kunsil Nengeri Batu Danau Paulus Palu Gumbang enggau bala ketuai komuniti di Limbang enggau Lawas.