Rayat patut nemu sida bebendar udah ngulihka belanja dikena mayar ungkus projek pemansang
KUCHING: Rayat patut nemu tetiap agih belanja ke dikena mayar ungkus projek pemansang ba tetiap sitak Kunsil Nengeri (DUN) iya nya datai ari pengari rayat Barisan Nasional (BN) lalu ukai nya ari ejensi perintah, opis pelilih tauka Gerempung Ukai Dikuasa Perintah (NGO) di nengeri tu.
Rayat enda patut ngembuan runding bansa nya laban ari penemu nya udah baka ti ngenggaika pengawa pengari rayat BN ti udah bebendar ngulihka agih belanja ari opis menteri ke bekaul dikena mayar ungkus projek pemansang di tetiap DUN, pia ku Kaban Kunsil Nengeri (ADUN) Engkilili Dr Johnnical Rayong Ngipa lebuh bejaku ba Pengerami Ngiling Bidai ke diatur Raban Nembiak enggau Indu Parti Rayat Bersatu (UPP) pampang Engkilili begulai enggau Komiti Pemansang enggau Pengelikun Genturung Pendiau (JKKK) Rumah Mangku, Sungai Keroh, Engkilili ditu bedau lama.
“Pekara tu dipeda baka ti mit, tang empas nya chukup besai laban agi mayuh rayat enda nemu pengari rayat udah bebendar ngulihka agih belanja dikena mayar ungkus tetiap projek tang kebendar kami pengari perintah udah naka ulih ngulihka agih belanja nya,” pia ku Dr Rayong.
Pengerami ke udah matak urung lebih 3,000 iku mensia mayuh ba kandang menua besemak mega bela bisi digulu Menteri Wang II, Menteri Dagang Antarabansa enggau e-Dagang sereta ke mega Presiden UPP Dato Sri Wong Soon Koh.
Ku iya nambah, bisi maya iya enda lantang ati sereta madah ngagai pengari ejensi perintah ti bekaul laban sida suah madahka duit nya datai ari ejensi sida tang enda madahka iya nya kebendar agih belanja nya udah dipinta pengari rayat.
“Ngagai sida ti nemu bekaul pekara nya enda ngawa, tang bakani ngagai sida ke bukai ti enda nemu pekara tu enggau silik... Sida terus ngerunding kami enda bejalaika tanggungpengawa ngulihka agih belanja lalu sinu agi ninga bisi sekeda madahka kami semina makai gaji buta nadai ngaga pengawa dikena ngulihka agih belanja nya ti dikena mayar ungkus projek pemansang,” ku iya nyemetak.
Ku iya, mayuh orang enda nemu iya nya sida (pengari rayat) nyauka belaya, puntan penemu sereta besabar enggau opis menteri ke bekaul lebuh ti deka minta agih belanja enggau pengingin ti dekaka semua kandang endur ari baruh pegai sida nerima pemansang ari perintah.
“Ketegal nya aku suah neyemtak madah ngagai semua enti nadai pengari rayat BN ke udah bebendar ngasurka diri begigaka agih belanja, nya reti ejensi perintah ti bekaul baka Opis Kereja Raya (JKR), Opis Parit enggau Entali Ai (JPS), KEMAS enggau Opis Pelilih sereta Residen enda teulihka dana dikena mayar ungkus sekeda projek,” ku iya.
“Belanja tu kebendar nya dipinta pengari rayat lalu nyema mujur belanja nya diagihka nagagai ejensi perintah ti bekaul laban sida ti megai tanggungpengawa nyuaka belanja projek ngagai kunteriktor,” ku iya nandu.
Iya ke mega Ketuai Raban Nembiak UPP madah, taun tu semua pengari rayat BN udah diberi belanja RM5 juta lalu semua duit nya dikena mayar ungkus projek pemansang kelebih agi di kandang menua pesisir.
“Belanja tu kami beri ngagai ejensi perintah ti bekaul laban sida ti bejalaika tanggungpengawa lalu belanja ti diagihka nya ukai ari opis menteri sida tang ari kami iya nya pengari rayat BN. Sida semina nguruska projek nya aja,” ku iya madah seraya ngarapka ejensi perintah lurus sereta enda beambi ulih ngempu nama nengah belanja ti diberi.
Bejaku sentang pengerami Ngiling Bidai nya, Dr Rayong madah pengawa nya entara program ke digaga Raban Nembiak enggau Indu UPP dikena ngenegutka agi kaul entara parti politik begulai enggau rayat.
“Kami enggai semina dipeda chakah bejalaika pengawa maya ti deka pengawa bepilih aja, tang UPP seruran begulai enggau rayat lebuh ti nyediaka servis ti patut lebuh maya senang tauka susah,” ku iya.
Berindik ari nya, iya dekaka 4,850 iku kaban UPP ba DUN Engkilili lalu urung 700 di Batang Ai chakah agi lalu sama bela begulai enggau rayat, ngambika pemisi sida seruran diasai.
“Anang sanggu laban kita semua iya nya pengari ke nyadi mata enggau pending perintah BN dikena meri servis ti pemadu manah ngagai rayat... Kitai kebendar nya sebagi ari kbana BN lalu anang ati dua meri bantu kita,” ku iya ke dekaka kaban UPP nyukung chalun ke deka dikirai BN ba Parlimen Lubok Antu iya nya Datuk William Nyalau Badak.
“Aku pechaya iya deka terus diberi peluang ngetanka penuduk dia lalu dekaka kita begulai enggau aku nyukung Kaban Parlimen (MP) kitai laban aku nyamai begulai gawa enggau iya semanjai penggal nyin kemari,” ku iya.
Nyalau ke mega bisi meri jaku lalau udah madahka pengelantang ati ngagai sukung ke udah dipansutka Wong Soon Koh ke nyadi Presiden UPP sereta Dr Rayong ti nyadi ADUN Engkilili.
“Aku ngarapka bisi diberi peluang ngetanka penuduk tu lalu pechaya ulih menang ngarika BN laban aku udah ngerejaka pengawa enggau naka ulih ungkup pemaik kededua DUN Engkilili enggau Batang AI,” ku iya.
“Tambah mega agi mayuh pelin aku begulai enggau kededua pengari rayat dia bedau agi tembu seraya ngelangkar pelin pemansang baru ngambika rayat ari baruh Parlimen Lubok Antu terus ngasaika pemansang nengah perintah BN,” ku iya.
Ramabau pengerami nya, Dr Rayong enggau Nyalau udah madahka deka meri agih belanja nengah Projek Mit Menua Pesisir (MRP) ungkup JKKK Rumah Mangku iya nya RM10,000 ari Dr Rayong enggau RM7,000 ari Nyalau lalu Gerempung Indu nerima RM7,000 enggau RM5,000. Dulu agi ari nya Dr Rayong mega bisi ngagaihka RM10,000 dikena mayar ungkus ngatur pengerami Ngiling Bidai nya.
Sama bisi datai ba pengerami nya Ketuai Raban Nembiak UPP Engkilili ke mega Chairman Pengatur Peter Jawi, Sekretari Eksekutif UPP Margaret Fong, Sekretari Raban Nembiak Besai Yap Min Su, Akim Kort Sabah Robert Pasang Alam, pemancha, penghulu, bala kunsilor, tuai rumah, pengari UPP sereta temuai dipebasa ke bukai.