JULAU: Lapan projek deka digaga ba sitak Meluan nengah agih belanja ari baruh Projek Tranformayen Menua Pesisir (RTP) ungkup taun tu.
Kaban Kunsil Nengeri (ADUN) Meluan, Rolland Duat madahka semua projek nya beungkus RM2.8 milion lebuh ti ngabas sekeda projek ti benung dipejalai ba sitak nya.
Entara projek ke digaga iya nya Balai Sekula Primari (SK) Ulu Entaih ke beungkus RM250,000; Jematan Sungai Entaih (RM400,000); projek ngaga jalai ari Sungai Entaih ngagai Rumah Sumping/ Enchana (RM450,000); projek ngaga jalai nuju Rumah John Siba (RM550,000); ngerataka tanah endur ngaga Rumah John Siba (RM200,000); ngerataka tanah endur ngaga Rumah Nyakin, Sungai Bangkit (RM400,000); ngemanahka jalai ngagai Rumah Enchana (RM300,000) sereta ngaga Balai SK Nanga Entaih (RM250,000).
Rolland ngarapka kunteriktor ulih nembuka semua projek nya dalam kandang taun tu.
Iya mega madahka ngagai peranak di kandang menua pesisir iya nya mayuh agi agih belanja nengah RTP deka diberi laban juluk perintah Barisan Nasional (BN) deka ngempitka seraka entara menua pasisir enggau mengeri ari semua sukut pemansang.
Entara ke bisi enggau Rolland lebuh ngabas palan projek iya nya pengari ari mayuh macham ejensi perintah sereta 18 iku tuai rumah ba sitak nya.