Ngambi tau pulaika pemaik ngagai orang ti ngempu tanah NCR, Pemakai Menua enggau Pulau Galau
KUCHING: Bansa Dayak patut diberi awak meda dulu langkar ubah undang-undang Kod Tanah ke bekaul enggau Pemakai Menua enggau Pulau Galau, ku Presiden Gerempung Dayak Graduet Sarawak (SDGA) Dr Dusit Jaul.
Ku iya bejaku ngarika semilan Gerempung Ukai Dikuasa Perintah (NGO) bedau lama tu tadi, pekara nya berat ngambika langkar ti deka nyadi undang-undang nya ulih ngintu pemaik orang ngempu tanah NCR, pemakai menua enggau pulau galau.
“Tu seraris enggau pinta Menteri Besai ti dekaka perintah seruran beratka pinta enggau peneka rayat nengah konsep inklusiviti,”ku Dusit.
Langkar pemakai menua enggau pulau galau nyadi sebengkah tanah NCR dalam Kod Tanah Sarawak disadang dibantaika ba aum Kunsil Nengeri (DUN) ba bulan November 2017.
Komiti ti megai tanggungpengawa nya betuaika Sapit Kepala Menteri Datuk Amar Douglas Uggah.
Komiti nya nitihka jaku Uggah dulu agi ari tu,mungkur raban bansa Dayak ke landik ba sentang tanah adat sereta mega nyengkaum raban luyar ke landik ba tanah adat.
Nitihka penerang Presiden SADIA, Sidi Munan, dua memorandum sentang tanah adat udah dianjung ngagai opis Uggah ngambika tau nyadi tenggau ngaga langkar nya.
Seiti memorandum digaga Dayak Think Tanks lalu seiti agi digaga SADIA.
Kelimpah ari SDGA enggau SADIA, tujuh NGO bukai ti ngenataika sukung iya nya Dayak National Congres (DNC),Gerempung Dayak Sarawak (PEDAS), Gempuru Besai Kristian Jaku Iban Malaysia, Dayak Right Action Force (DRAF), Serian Iban Remun Association (SIRA), Sarawak Society for The Right of Indigenous People (SCRIPS) enggau Dayak Think-Tank Group.
Semilan NGO tu mega dekaka perintah nengeri ngeluar perintah ngambika semua kes pechara ke bekaul enggau tanah NCR di kort ditangguh dulu.
Dusit, ba jaku iya madah semua kes patut ditangguh nyentuk ke perintah ngaga ubah ba kod tanah ti deka nyadi sebengkah undang-undang.
Ku Dusit, peranak bansa asal ke bisi pechara kes tanah ba kort mengkang ngenanka hak sida ba tanah diri maya ke diatu.
“Peranak asal ke nyadi orang ngempu tanah irau enti kes mengkang dipechara baka selama, nasit sida deka sebaka enggau nasit Tr Sandah, iya nya lenyau pemakai menua enggau pulau galau.
“Pekara tu berat ketegal semua kort, iya nya ari kort apil nyentuk ngagai kort tinggi deka nitihka pemutus kort ba kes TR Sandah,”ku Dusit.
Nyentuk ngagai ujung taun 2016, urung 300 kes NCR mengkang nganti dipechara ba kort.