KOTA SAMARAHAN: Urung lapan puluh tujuh iku anak patu ke benung belajar di Universiti Teknologi MARA (UiTM) beruntung endar nerima bantu ti disua Tuai Megai Menua (TYT) Sarawak, Tun Pehin Sri Abdul Taib Mahmud enggau bini iya, Toh Puan Datuk Patinggi Raghad Kurdi Taib ba program Iftar Pelajar UiTM begulai enggau Tuai Megai Menua enggau bini iya.
Program nya mega mungkur bala nembiak UiTM pampang Sarawak betuaika Rektor UiTM Prof Dato Dr. Jamil Hamali ba luar Palan Pelajar Kampus Samarahan 2 ditu, malam kemari.
“Kami ngarapka pemeri tu, deka ngelempungka sereta ngagaka ati bala nembiak kitai pulai ke menua diri, ke deka ngintu Hari Raya begulai enggau kaban belayan sida, taja pan nadai agi apai tauka indai.
“Lebuh pulai ke menua diri empu, apai indai mih orang ke pemadu dikelengau bala nembiak tu. Taja pia, sida tentu berasai puang sereta sinu ati lebuh nadai agi orang ke dikesayauka sida enggau ngintu hari besai tu,” ku Jamil.
Program nya bela digulu Pro Canselor UiTM Tan Sri Dato Sri Safri Awang Zaidell enggau bini iya, Puan Sri Liliah Mohd Salleh, bala sapit rektor nyengkaum 350 iku nembiak UiTM Pampang Sarawak.