SRI AMAN: Sekula Sekondari (SMK) Simanggang deka bisi sebuah begunan baru ungkup ti beungkus manggai RM 1,882,136 pengudah begunan nya tembu dalam timpuh semilan bulan ti deka datai.
Menteri Muda Pengelantang Komuniti Sarawak, Datuk Francis Harden Hollis madahka pengawa ngaga blok baru dikena nukar dua blok sekula ti angus kena 7 Julai 2013 suba.
“Pengawa meresika taba begunan lama udah tembu lalu kereja ngiga taba begunan baru mega udah mujur diatur piak kunteriktur ti dipadu.
“Pia mega, endur ngengkahka tangki ai udah tembu didiri sereta kereja numbak lubang tiang mega udah tembu seraya sekeda pengawa ke bukai ngupas taba begunan mega udah tembu,” ku iya madah ngagai pengarang berita rambau pejalai ngabas taba projek semak ditu, pagi kemari.
Harden ke mega nyadi Kaban Kunsil Nengeri (ADUN) Simanggang madah, enggau penembu begunan baru tu ila deka meri rampa baru ngagai sekula tu,” ku iya nerang silik.
Sama bisi nyempulang atur pengawa ngabas nya Prinsipal Sekula Kuso Jantan, ChairmanPIBG Jelani Sating, Pemancha Lee Siang Hua, Kapitan Tiong Chong Onn, Kaitan Tay Yaw Ming, Kapitan Kuek Aik Seng sereta bala bukai. Rambau pejalai nya, Harden mega bisi nyuaka geran penyampau RM 50,000 ngagai PIBG sekual kena bejalaika aktvitivi sepanjai taun sida.