KUCHING:Chalun Barisan Nasional (BN) ba sitak Kunsil Nengeri (DUN) Pujut meseti seiku ketuai ti dikerindu rayat, ku Presiden Parti Bersatu Rakyat Sarawak (SUPP) Datuk Prof Dr Sim Kui Hian.
Taja pia ku iya ke mega Menteri ba Opis Kunsil Kandang Menua, pemutus sentang chalun nya deka ditentuka raban ketuai renggat tetinggi BN nengeri.
“Chalun ngarika BN di sitak DUN Pujut dilempaika ngagai ketuai renggat tinggi BN ke alai chalun nya meseti dikerindu rayat,” ku iya.
Dr Sim mansutka jaku nya ba aum pengarang berita sebedau bejadi Bazaar Ramadan Kota Sentosa 2017 ditu, kemari.
Ngenang kaul ke sama, Dr Sim ngelalau semua raban parti SUPP bendar agi gawa ngambi ulih nentu sitak nya pulai ngagai SUPP, diarika chalun SUPP.
“Rintai nama chalun udah dianjung ngagai Kepala Menteri (KM) tang aku bedau ulih madahka nama nya maya tu,” ku iya.
Kena 27 Mei tu tadi, Kepala Menteri Datuk Amar Abang Johari Tun Openg bisi madah udah nerima rintai nama chalun ungkup Pengawa Bepilih Mit (PRK) DUN Pujut ari SUPP.
Abang Johari mega madah bisi nerima rintai chalun ari Parti Rakyat Bersatu (UPP).
Nitihka penerang ari Abang Johari, chalun ngarika BN ba PRK nya deka ditemu enda lama agi, dipelaba pengudah pengerami Hari Gawai.
Penuduk DUN Pujut puang pengudah pemangku sitak nya Dr Ting Tiong Choon(DAP) diketu ari mangku pengawa nya.
Mosyen ngetuka Tiong Choon digaga kena 12 Mei tu tadi ba aum DUN pengudah ditemu ngembuan dua peranak, Malaysia enggau Australia.
Chairman Komiti Pengawa Bepilih(SPR) Datuk Seri Mohd Hashim Abdullah ba seiti aum pengarang berita dulu agi ari tu netapka PRK DUN Pujut deka diadu kena 4 Julai 2017.
Hashim mega madah maya ngantung nama chalun ditetap 20 Jun 2017.
Ba Pengawa Bepilih Besai ke diatur ba bulan Mei 2016, Tiong Choon menang nengah majoriti 1,759 undi ngalahka chalun BN Datuk Hii King Chiong, PAS (Jofri Jaraie) enggau chalun ngatika diri Fong Pau Teck.