SARIKEI : Kaban Parlimen Julau madah, udah datai ba maya ke patut nyendiaka palan ke meruan agi ungkup Unit Volunteer Bomba di Lembah Lemba, Bayong, Ulu Sarikei.
Salang bejaku munyi nya lebuh bejadi pengerami nasih tanah ba palan perambu ngaga langkau Unit Volunteer Bomba ba tisi Rumah Nyuka kena lemai Hari Empat, ke nerima puji ari Opis Pengerara Api enggau Penyah Penusah Pelilih Menua nya pengudah unit volunteer mujur ditumbuhka ba kandang menua nya dalam taun 2013.
Nengah awak nya mega, iya ngenataika pengaga ati ngagai peranak Rumah Nyuka ti nadai penanggul nyadi volunteer sereta mega ngagai pemanah servis sida ke udah mantu ba sekeda kes angus enggau penusah ngenyit ke nyadi sekumbang udah ditumbuhka.
Aku pechaya, unit tu deka beoperasyen enggau manah agi enti sida bisi palan ke manah endur bejalaika pengawa, ku Salang.
Salang mega madahka Unit Bomba Volunteer nya engkeman amat ditumbuh ba Lubuk Lemba Voluntary Bomba laban mayuh rumah panjai bukai ngelingi nya.
Seraya ngelalau raban volunteer nya bekerejasama enggau Balai Bomba Pelilih Menua nya ngambi ulih ngangkatka penyikar sida kelebih agi ba teknik ngerara api, Salang mega ngarapka peranak rumah panjai nyukung bala volunteer nya.
Dulu ari nya, Salang nyuaka bantu mata duit ari Ejensi Mutarka Penusah Ngenyit Menua (Nadma) ngagai 100 ruang bilik di ulu Sarikei ke udah dituntung penusah ngenyit empai lama udah.
Sama ba pengerami nya Kaban Kunsil Nengeri Repok, Dato Sri Huang Tiong Sii; Kaban Kunsil Nengeri Meradong, Datuk Ding Kuong Hiing; Residen Sarikei, Mohd Junaidi Mohidin;. Pengari Direktor Nadma, Farhan Sufyan enggau Pemancha Edward Laden ngarika Kaban Kunsil Nengeri Pakan, Tan Sri William Mawan Ikom.