Anda di sini

Gawai Dayak ngemujur dua pekara

Advertisement

Gawai Dayak peluang ngagai semua bansa Dayak begulai lalu nguna awak nya memanah kelimpah ulih bejual ba Gawai Bazaar

KAPIT: Sapit Kepala Menteri Tan Sri Datuk Amar Dr James Jemut Masing madah, pekara pemadu beguna Gawai Dayak tu enda tau enda nyadi pelasar ngagai dua pekara.

Kesatu ngempung bansa Dayak di Kapit begulai lalu kedua ngajar raban pedagang Dayak ti bisi potensial belajar bedagang baka ti udah dipeda ba Bazaar Gawai di old padang bilun, Jalai Padang Bilun.

Tu manah endar, kami (perintah) enda tau enda ngaga pelasar nya,” ku Masing.

Ku iya, Gawai Dayak tu ungkup semua bansa Dayak begulai sama lalu ngena awak ngambika sida ulih bedagang di Bazaar Gawai.

Gawai Dayak tu peluang ngagai semua bansa Dayak begulai lalu nguna awak nya memanah kelimpah ari sida ulih bejual ba Gawai Bazaar. Dikearap sekumbang sebulan Bazaar Gawai ti berengkah ari 28 April nyentuk 28 Mei, sida bulih belanja mimit, kelimpah ari ulih ngasai empu seni ba pengawa dagang

Bansa Dayak raban bansa ke pemadu mayuh di Sarawak lalu tu meri sida belanja dikena ngintu Gawai ti deka diintu enda lama agi.

Sapit Menteri Pemansang Menua Pesisir enggau Kandang Menua Datuk Alexander Nanta Linggi ngarapka Gawai taun nyin ila mujur agi, mayuh agi peneleba, pengidup ti menyana agi ari taun ke udah.

Aram semua kitai belajar ari pekara ti udah nyadi, ti enda entu manah, pekara ti beguna tauka pekara ti nguntungka kitai.

Ba taun ti deka datai tu, berubah lalu kitai deka idup manah agi. Aku besampika semua orang ngasaika taun ti manah agi, 2017 ngagai 2018.

Kaban Parlimen (MP) Ulu Rajang Datuk Wilson Ugak Kumbong bisi ngenataika pesan ngagai semua komuniti Dayak meri Selamat Gawai Dayak 2017.

Iya ngarapka taun tu nyadi taun ti manah agi enggau mayuh pemansang sereta mega ngarapka semua komuniti Dayak anang enda ngubah runding sida laban Kapit deka mansang.

Peranak Kapit enda tau enda ngubah runding sida laban nyema sida enda nerima pemansang, sida deka tinggal di belakang. Sida deka jauh tinggal ari pemansang besai dudi hari.

Perintah deka ngubah Kapit nengah pemansang ti besai jemah. Iya ngarapka bansa Dayak ngena awak tu, berunding di luar kutak dikena ngubah nasit sida.

Iya mega ngelalau semua ti ngintu pengerami bejejimat di rantau jalai maya sida mulaika diri ke rumah panjai.

Anang kelalu laju, anang ngirup ai bisa mayuh laban tu enda manah ke pengerai sereta bejalaika semua atur pengelikun ti patut.

Kena awak tu madahka ngagai rayat, kelebih agi sida di rumah panjai ngambika ngubah runding nitihka pemansang.”

Kaban Kunsil Nengeri (ADUN) Pelagus Wilson Nyabong Ijang meri Selamat Gawai Dayak ngagai semua bansa Dayak. Iya ngelalau sida anang kelalu masau belanja Gawai tu. Ku iya, belanja patut dikelimat ungkup pelajar bala anak laban sida tu reta apai indai enggau ketuai dudi hari.

Beri sida pelajar ti menyana kena nyikap sida enggau pengelandik sereta penemu ti bekaul ngambika ulih besemekih napi pemar arus pemansang dunya.”

ADUN Bukit Goram Jefferson Jamit Unyat madahka gawai tu pengerami kitai ngusung pangan diri. Dikena negapka agi penyerakup ke bisi sereta pengelantang pupu bansa ngambi meretika adat enggau gaya pengidup pangan diri.

Chairman Gerempung Bansa Dayak Sarawak (SDNU) Joseph Jinggut ke mega Chairman Gerempung Orang Bumai Sitak Kapit – lalu inisiatif tu benama URDA – Upper Rajang Development Authority. Diatu Kapit ari baruh RECORDA.

URDA patut nyadi gempung ngatika diri baka Bintulu Development Authority (BDA) enggau Sapit Kepala Menteri Tan Sri Datuk Amar Dr James Jemut Masing, Sapit Menteri Pemansang Menua Pesisir enggau Kandang Menua Datuk Alexander Nanta Linggi, sereta bala pengari rayat ke bukai ulih gawa memanah baka BDA ke alai iya endang ngatika diri ngaga pemutus ti patut dipejalaika di Kapit.

Tu pengarap aku lebuh sida merambu URDA, nya ukai sebengkah ejensi, pekara bukai baka piak bekuasa ti patut ngatika diri sereta enda ibuh ngeripot ngagai RECODA.

Ngebut pasal nyikap raban nembiak ku Joseph, ke bendar SDNU meri awak ngagai bala nembiak. Kami meri sida awak ngatur Pengerami Makai Lemai Gawai taun tu. Tu awak ti chukup manah ngagai sida mantaika penau diri nengah pengawa ngatur. Tu ukai pekara ti mit diatur tang sida udah ngatur enggau naka pemujur sereta lanchar. SDNU meri peransang ngagai sida nembiak.

Ketuai Raban Nembiak SDNU Judson Jarrau madahka pengerami Gawai tu mungkur semua. Kitai ngangauka bala ketuai ari pupu bansa datai ngulu Pengerami Makai Lemai Mantar Gawai.

Lebuh sida datai sida meda sereta ngemataka pengawa ti digaga kitai maya ngintu baka miring, bepantun, bebiau enggau ke bukai.

Pedagang Dayak, Lidam Assam ke mega Ketuai Ranting PBB Pampang Katibas besampika semua bansa Dayak betuah belimpah.

Advertisement