Anda di sini

Semua kandang menua pesisir di bekal karan manggai ba taun 2025

Perintah udah ngelangkar bemacham projek pemansang nengah RTP

KUCHING: Menteri Bekal Ai enggau Eelekterik Menua Pesisir Dato Sri Dr Stephen Rundi netapka semua kandang endur di menua pesisir deka bisi bekal elekterik manggai ba taun 2025.

Ku iya, tajapan sekeda ari semua peranak nengeri tu diau betumpuk ba mayuh bengkah kandang endur di menua pesisir, perintah tetap komited deka nyendia bekal elekterik 24 jam nengah Program Transformasyen Menua Pesisir (RTP).

Peranak di menua pesisir pan bisi hak ngasai pengelantang bekenaka perengka guna baka sida ke diau di mengeri.

Ungkup pemujur RTP, seiti komiti kabinet deka ngemata Palan Pemujur Besai (KRA) ba pengawa nyendia bekal lektrik ba tetiap pintu bilik di menua pesisir,” ku iya.

Dr Rundi mansutka jaku nya rambau nyimpul jurai sentang pekara ke bekaul enggau opis menteri iya rambau Aum Dewan Undangan Negeri (DUN) di Komplek DUN ditu, kemari.

Iya nambah 3 tusun pengawa udah disedia ngambi nentuka juluk nya ulih dijapai.

Keterubah, nengah Skim Elekterik Menua Pesisir (RES), bekal elekterik (wayar) tambah 33/11kV deka disambung ari grid ke udah digaga.

Kedua, nengah Skim Bekal Kuasa Menua Pesisir (RPSS) wayar transmisyen sereta substesyen 275/132KV deka didiri ba palan ke engkeman ngambi tau nambah grid di menua pesisir ke dibungkur RES.

Ketiga, sistem solar enggau mini hidro nengah inisiatif HYBRID tauka SARES deka digaga ba kandang endur ke bedau bisi grid,” ku iya.

Ngenang kaul ke sama, Dr Rundi ke mega Kaban Kunsil Nengeri (ADUN) Kemena madah, perintah besai nengah Program Transformasyen Perintah (GTP) ngemeratka pengawa nyendia perengka guna ba menua pesisir.

Ku iya, agih belanja penyampau RM2.94 biliun udah diagih berengkah ari taun 2009 nyentuk 2015 ke alai 87,300 pintu bilik udah disambung enggau bekal elekterik dalam timpuh nya.

Kelimpah ari nya iya mega madah nengah Atur Pemansang Malaysia Lumpar ke-11 (RMK11) ari taun 2016 nyentuk 2020, perintah besai udah ngagihka RM1.34 biliun ungkup projek nambah grid (elekterik) sereta skim bekal kuasa ke bukai.

Perintah nengeri ngagihka RM270 juta ungkup projek bekal kuasa diguna baru, SARES.

Agih belanja tu deka mai penguntung ngagai 29,700 pintu bilik,” ku iya.

Penyampau bungkur bekal elekterik di serata nengeri diatu ku Dr Rundi iya nya manggai 87 peratus.

Sarawak mengkang begunaka agih belanja tambah ba penyampau RM6.7 biliun ari perintah besai dikena nentu semua kandang menua pesisir bisi nerima bekal elekterik, ku iya nandu.