Anda di sini

Pengajar interim ke enda dipilih patut nerima pemutus enggau ati tebuka

Advertisement

SIBU: Raban komiti pengatur intebiu ungkup orang ke ke minta nyadi pengajar menua tu patut nyerenih bala chalun sereta netapka standard enggau kriteria ti patut dikembuan sida diintebiu.

Presiden Serakup Pengajar Sarawak (STU) Jisin Nyud madahka pekara tu beguna endar dikena nentuka semina chalun bekualiti aja dipilih mangku pengawa nyadi pengajar.

Beratika taun-taun ke udah, bala pengajar ti deka dianjung ngajar, sida mega meseti berunding nentuka pengepuh bala pengajar tu ngajar bala anak kitai dudi hari.

Kitai enda ulih ngenggaika bisi sekeda pengajar interim ti enda pas kedua kali chukup angkunka pengawa ngajar tang nadai nasit. Bala sida meseti nerima pemutus nya,” ku iya madah ngagai thesundaypost kemari.

Tambah mega, Jisin ngenang sebedau tu mega tauka taun-taun ke dulu, sida patut pas intebiu enggau peresa ti nentuka sida ulih tama ngagai palan pematih pengajar lalu mayuh sida tu enda pas.

Bisi sekeda bala pengajar sementara ke bisi peneleba ngajar betaun pengelama mega enda pas tang sida terus nganjung peminta ngujungka sida teulihka pemujur lalu ulih tama ngagai palan pematih pengajar, ku iya, seraya nampung, iya ngarapka sida tu deka neladan nya.

Jisin nimbal pasal berita ba The Borneo Post kena Hari Tiga tu tadi ke alai 80 ari 236 iku pengajar ari Sarawak ti diberi awak kedua ngambi peresa psikometrik diatur Komiti Opis Pelajar (SPP) dalam bulan March, enda pas.

Seiku ari pengajar interim bisi mansutka pengasa ati bekaul enggau pemutus sereta alit ati baka ni sida meresa nya, merambu ngambika keretas peresa diperesa baru nengah orang bukai ke endang ari Sarawak.

Sentang pekara tu, ku Jisin, STU sinuka bala pengajar interim ari Sarawak ti udah diberi awak kedua napi peresa spikometrik diatur SPP dalam bulan March tang enda pas.

Ngelansa pasal tanya rambau intebiu, iya baka ti kelalu tang nyadi pengajar, sida mega meseti seruran ngadang nyaut tekala nya sereta tebuka ngagai sebarang tanya, ku iya.

Ba sekula mega baka nya, mayuh pekara enda disadang nyadi ti ngaul bala apai indai, pengajar enggau nembiak sekula, ti nitihka pematut enda patut nyadi tang iya nyadi.

Aku pechaya intebiu tu ukai semina pasal pekara moral tang mega bisi pekara baka ngelala pengelandik chalun, penemu enggau penau ulah diri,” ku iya.

Sebedau tu diripot servis 210 iku pengajar interim diketu ketegal sida enda pas ba peresa ke sama ti ditapi sida dalam bulan Disember taun nyin tadi.

Taja pia, berindik ari bantu ari Kepala Menteri Datuk Amar Abang Johari Tun Openg, Menteri Pelajar Datuk Seri Mahdzir Khalid, dikemendarka nampung servis sida nyentuk 30 Jun lalu diberi awak kedua ngambi peresa nya baru. 

Nambahka nya, 210 iku pengajar interim mega diberi awak kedua ngulu sesi intebiu SPP.

Menteri Pelajar, Sains enggau Pansik Teknologi Dato Sri Michael Manyin Jawong, ke baru dipadu deka betemu enggau Chairman SPP Sri Dr Haili Bolhan, berandauka pasal bala pengajar interim ari Sarawak ti enda pas peresa psikometrik sida bedau lama ke udah.

Ku iya, iya udah berandau enggau Haili kena pagi Hari Empat netapka randau. Berita madahka 80 iku enda pas peresa dalam bulan March tang ku Manyin semina 76 iku aja.

Advertisement