Pengawa latih praktikal ba makmal sains ti manah sereta rindang ulih matak nembiak tama kelas Sains
SIBU: Chara ngangkatka agi tikas latih pratikal dalam makmal sains ba sekula serata menua tu engkeman dikena nambahka agi pemayuh bala nembiak tama kelas sains.
Presiden Gerempung Pengajar Sarawak (STU) Jisin Nyud madah, Opis Menteri Pelajar ngelama tu udah bisi pelin ke manah.
Ku iya, tu nyengkaum ngajar Sains enggau Matematik dalam Jaku English (PPSMI) sebengkah ari pelin KPM ke pemadu manah.
Tang ku iya, pelin nya udah diketuka sebedau tuju deka nempa mayuh agi nembiak ngambi subjek Sains nyadi.
“Naka ke diatu, ke beguna amat iya nya ngembing bala nembiak ngambika sida rinduka subjek Sains lalu tu patut digaga chakah agi ba tiap bengkah sekula ba serata menua baik nya ba kandang mengeri tauka menua pesisir.
“Aku pechaya, chara ngaga pratikal ba subjek Sains ulih nyungkak agi pengerindu nembiak laban tu bekaul enggau latih ‘amali’.
“Semua tu patut disukung opis menteri belama lebih agi sukung ari belanja,” pia ku iya madah.
Iya bejaku munyi nya maya dipinta meri penemu sentang perambu Sapit Menteri Pelajar Datuk Chong Sin Woon ti ngarapka latih pratikal ba makmal sekula ba serata menua tu dikemayuhka agi dikena nambahka penyampau nembiak ngambi subjek Sains.
Ba pekara bekaul, Gerempung Pengajar Bumiputera Sarawak (KGBS) bela sepenemu enggau Chong.
Ketegal nya presiden sida, Ahmad Malie ngansak KPM chakah agi ngemanahka agi makmal sekula ba serata nengeri tu.
“KGBS enda nengeri Sarawak tinggal tauka laun ba pengawa ke dikerja KPM,” ku penemu gerempung nya.
Ahmad madah, pengawa opis menteri nya nambahka agi latih pratikal mandangka KPM ngemeratka isu nembiak enda mayuh ngambi subjek Sains.
Nambahka nya, KGBS mega ngarapka nembiak Bumiputera nimbal peminta tu enggau chara ngambi subjek nya.