KUCHING: Pengelandik ngukir kayu ke mega dikumbai seni alus nempa nama Yunus Basri di Pelilih Mit Song.
Peranak asal Genturung Pendiau Semop, Matu ti ngembuan pengelandik nya kenyau ngangkatka diri bujang sigi rinduka seni alus, nguna pengelandik jari ngaga produk tauka perengka tradisional sereta replika.
Tebilang di Pelilih Mit Song, Yunus ngambi inisiatif ngaga tauka nyendia mayuh replika ungkup komuniti Song.
Naka ke diatu, iya udah ngaga replika bujang berani Iban ke tebilang iya nya -Balang Balai Nyabong sereta replika jelu kerbau dirumah Jarop, Nanga Sepadi, Katibas Song.
Yunus ke bebini ngambi Indu Iban ari Nanga Sepadi mega meri asil pengelandik jari iya baka ke replika burung kenyalang ngagai Palan Internet Song enggau Opis Pelilih Mit Song.
Nitihka penerang ari seiku peranak Song, Paren Nyawi, mengkang mayuh peranak menua nya ngembuan pengerindu baka enggi Yunus.
“Di Pelilih Song, mengkang mayuh raban orang kelebih agi sida ke nembiak rinduka seni alus.
“Sida ngaga produk tauka perengka tradisional ngambika tau dijual tauka ungkup guna diri,’ku Paren ke mega Pemantu Kaban Parlimen(MP) Sibu.
Berindik enggau nya, Paren ngarap perintah ulih numbuhka seiti organisasyen ke ngembuan penegap ba tusun pengawa sereta pekara belanja ti ulih mantu ngintu kelimpah nempa mayuh agi orang ke ngembuan pengelandik jari.
Ku Paren, produk tradisional ari asil pengelandik jari tau diangkat nyadi seiti produk komersial.
‘Nengah chara nya,produk sereta main asal bansa asal kelebih agi ari Pelilih Song ukai semina ulih dikelaku ngagai dunya luar tang dipeturun ngagai nembiak rebak baru,”ku iya.