Entukar lekterik disadang nganti entukar ke nguna petrol dalam timpuh 15 taun ti deka datai
KUCHING: Perintah nengeri berunding deka nyendia perengka guna ungkup entukar lekterik ke disadang nganti entukar ke nguna petrol dalam timpuh 15 taun ti deka datai.
Kepala Menteri Datuk Amar Abang Johari Tun Openg madah pekara nya beguna amat laban dalam timpuh 10 nyentuk 15 taun ti deka datai, teknologi entukar deka bisi ubah.
Ku iya, ubah ba teknologi entuka nya digaga ketegal pemerat ngintu pemaik rampa menua ke alai entuka ti nguna petrol ngemansut asap ke tau ngeruga pemaik angin.
“Diatu mayuh entukar nguna petrol lalu aku ngasai pemaik angin dikemerat komuniti sereta orang ngempu entukar.
“Aku udah meda entukar ti nguna injin lekterik ke diidupka bateri lalu tu mih teknologi baru, ari ti nguna petrol ngagai lektrik.
“Aku pechaya dalam timpuh 15 taun ti deka datai semua entukar deka nguna teknologi baru tu lalu kitai sereta kompeni pemansut entukr enda tau enda nyikap diri,’ku iya.
Abang Johari mansutka jaku nya rambau bejadi MD World Sdn Bhd - New Produa Showroom ditu, kemari.
Entara perengka guna ke deka disedia ku Abang Johari iya nya palan servis ngecaj sel bateri entukar ti nguna teknologi lekterik.
“Ungkup kitai di Sarawak, kitai deka nyendia tiang ke dipasang enggau adapter ngambika ulih ngecaj bateri.
“Ngepunka atur tu kitai deka nguji ba bas laban perengka pengangkut tu balat ngemansutka asap.
“Engka bisi sekeda kompeni bas enda setuju, tang kitai enda ulih nyeliah diri arika nguna teknologi baru tu,”ku iya.
Kelimpah ari nya iya mega ngelalau kompeni pemansut entukar di menua tu berundingka pekara nya enggau berat ngambika enda tinggal ba teknologi entukar.
Entukar di Malaysia enggai nyadi enda nguna teknologi baru tu laban pemeli dekaka teknologi tu ke enda ngeruga pemaik angin.
Bela datai Sapit Kepala Menteri Tan Sri Datuk Amar Dr James Masing, Speaker DUN Datuk Amar Mohamad Asfia Awang Nassar, Managing Direktor Perodua Sales Sdn Bhd Dato Dr. Zahari Husin enggau Chairman MD Group Donald Lawan.