Anda di sini

Semina nengah pemujur aja PH ulih nguasa Putrajaya

Advertisement

KUCHING: Pemujur Pakatan Harapan (PH) Sarawak ba Pengawa Bepilih Besai Ke-14 (PRU 14) amat beguna dikena nyapai juluk merintah Putrajaya.

Pengari Kaunsil Pemesai Pusat Parti Keadilan Rakyat (PKR), Hee Loy Sian madah, PH enda patut semina bepanggai ba pemujur parti nya di Semenanjung Malaysia baka ke nyadi ba PRU sebedau tu.

Iya bepenemu, di Sarawak PH kelebih agi PKR dipelabaka ulih menang ba sekeda sitak parlimen maya PRU 14 tu ila.

Enti kitai deka merintah Putrajaya nyadi perintah besai, kitai anang enda ibuhka bantu ari Sarawak.

Kitai anang semina menang di Semenanjung aja, tang di Sarawak alah, tu enda manah.

Ba peda aku, bisi ba sekeda sitak Parlimen di Sarawak kitai ulih menang baka di Baram laban kitai semina alah 100 lebih enggau sitak Saratok alah 2,000 undi,” ku iya betundi seraya bepesan minta Ali Biju (ADUN Krian) chakah agi bejalai ba Parlimen Saratok, dikena nentuka pemujur maya PRU tu.

Hee mansutka pekara nya lebuh bejaku ba Konvensyen Keadilan Sarawak 2017 ke diatur ba sebuah hotel ditu, kemari.

Lebuh ngenang pasal PRU Ke-14, Hee arap bendar pengawa bepilih nya nyau semak amat lalu iya ngarapka PKR ulih nyikap diri sereta berandauka pekara dikena napi PRU maya konvensyen sehari nya.

Ku Hee, enti nitihka timpuh lima taun deka abis 24 Jun 2018, ke alai ari diatu bisi 14 bulan agi, lalu Menteri Besai Datuk Seri Najib Tun Razak ulih minta pengawa bepilih diatur sebarang maya ari diatu.

Enti Najib deka ngatur pengawa bepilih tumu agi, iya ulih ngadu ari diatu. Bisi sekeda orang madahka diatu bulan Mei, bisi madah bulan Julai lalu bisi mega madahka bulan Oktober.

Enti nitihka kelai, PRU 14 tu endang udah kelalu semak, laban kami dalam perintah nengeri Selangor bisi bulih penerang ti ukai semina ari SPR tang laban PBT ke dijaga kami.

Nyema SPR deka ngatur pengawa bepilih sida deka ngena dewan lalu semua pasal dewan nya udah mujur diatur sereta sida ngena pengereja pengawa PBT, semua nya udah bisi pelin sereta udah besedia, semina nganti maya deka ngetuka parlimen.

Aku dipadah bulan 10 pemadu semak. Nama kebuah? Laban sida nguna peluang ke manah iya nya maya Hari Raya Aidilfitri, pengerami ngintu 60 taun merdeka sereta gempuru besai 916 Hari Malaysia, ngambi sukung ari raban biak,” ku iya seraya madahka enti ba bulan Oktober, reti iya urung enam bulan agi ari diatu.

Kelimpah ari nya lebuh ke ngenang pasal parti kompenan PH ti nadai belalai minta sitak tauka kerusi nengah surat kabar, Hee madahka nya pekara ke enda patut nyadi laban pekara nya agi ulih diperundingka dalam PH.

Aku amat berasai enda lantang enggau ulah parti komponen PH ti nadai belalai minta kerusi tauka sitak nengah surat kabar, aku ngasaika tu ukai chara ke pintar, kitai patut berandau dalam PH.

Kitai patut bebasaka pangan diri, enti deka berandau kitai nadai penanggul sekalika deka besilih kerusi, tang anang nyau nengah media maya deka minta sitak ari PKR, aku enda setuju.

Kitai (PKR) udah lama ngetanka sitak ke udah dimenang nya, lalu enti ulih kitai deka terus nudukka chalun ba sitak nya kelebih agi  ba Parlimen Miri,” ku iya bepenemu semua komponen parti patut bisi disiplin.

Advertisement