BINTULU: Kaban Parlimen Bintulu Datuk Seri Tiong King Sing ngansak raban nembiak enggau indu di menua pesisir ngambika regas ba tetiap program ti diatur Gerempung Ukai Dikuasa Perintah (NGO) ba kandang menua sida.
Ku iya, raban indu patut regas ba mayuh bengkah aktiviti rama kelebih agi ba gerempung lalu ngulu program nyadi ketuai dikena ngelaika sida ulih besemekih enggau bala nembiak sereta raban indu di mengeri.
“Semua tu setipak enggau juluk perint ah ti seruran deka ngangkatka raban nembiak enggau indu di menua pesisir ngagai tikas ke tinggi agi,” ku iya.
Iya bejaku munyi nya lebuh bejadi ‘Seminar Kepimpinan Wanita’ beserimbai enggau Program Sepakat 1Malaysia Renggat Komuniti 1Malaysia(K1M) Pasar Sebauh sereta ngintu Taun Ke-2 Sebauh udah ditumbuh nyadi Pelilih Menua di Rumah Agnes Mampak Mandaw ditu ensanus.
Sama bisi datai Sekretari Politik Ketpala Menteri Jenny Bangga,D.O Sebauh, Desmond Douglas Jerukan enggau Pemesai Opis Pemadah Bagi Menua Miri-Bintulu, Aba Sam.
Tiong mega madah, raban nembiak enggau indu patut diiri enggau penemu pasal tanggungpengawa siad kelimpah patut nemu pasal pekara ke baru nyadi diatu.
“Ngembuan penemu mayuh ulih mantu ngenegapka raban indu ditu enggau nengeri ditu lalu nentuka sida ulih bediri sama tinggi lalu duduk sama pemaru enggau raban lelaki ba semua bidang,” ku iya.