MIRI: Nembiak mit bansa Penan, Hana Thomas, ada ba Long Jekitan Silat, Ulu Baram, nerima surat pengada iya pengudah tiga kali nganjung peminta sereta bantu Kaban Kunsil Nengeri (ADUN) Telang Usan mantu ngemujurka peminta nya.
Indai Hana, Riat Ukat, 24 taun, meri terima kasih ngagai ADUN Telang Usan enggau Opis Pengerejista Bansa (JPN) Miri.
Ku Rita, Dennis enggau pemesai JPN udah nyaup iya ngisi semua penerang ti diguna ba pom peminta ketiga kali dalam pun bulan tu tadi.
“Aku meri terima kasih ngagai Dennis ke udah datai mantu komuniti Penan, nadai ngira sekalika ba pasar, mengeri tauka sida ke diau ba tumpuk pendiau jauh di menua ulu.
“Sehari tu ngayanka pengeran iya deka mantu raban nembiak rebak baru Penan ngembuan surat pengada enggau tingki,” ku Rita madah ngagai The Borneo Post, pengudah Unit Mindah Kin Kitu JPN Miri nyuaka surat pengada ngagai anak indu iya, ba Piasau, kemari.
Sama bisi datai Ketuai Unit Mindah Kin Kitu JPN Miri Affrizan Bujang enggau Kaunsilor Jarau Braim.
Nitih ku Rita, keterubah iya nguji minta surat pengada anak indu iya di Marudi lalu dipadahka iya enggau laki iya enda sah jadi melaki bini sereta begunaka aku ari penghulu ari rumah panjai besemak enggau iya.
Iya madahka diri udah nguji baru ngagai UTC Miri, taja pia, sehari nya hari ngintu Hari Pengada Agong lalu hari kemisi besai, ke alai palan nya ditutup.
Nya alai, ku iya, tu ketiga kali lebuh penanggul ditapi nerima perati ari ADUN Telang Usan, Dennis Ngau, iya terus ngemai pekara nya ngagai tim Mindah Kin Kitu JPN ba Piasau dalam pun bulan tu tadi. Pengudah dua minggu, peminta surat pengada tu udah dikemendar.
Ngingatka raban bansa Penan ke bukai, ti datai jauh ari rumah panjai sida nentuka diri ngemai semua dokumen bekaul nyengkaum tingki apai enggau indai, surat pengada enggau surat tikah ari Ketuai Raban Bansa tauka Penghulu sebedau nganjung peminta.
Ku iya, tu deka enda masau hari enggau belanja ngagai sida ke datai ari menua ulu ngelawa opis pelilih besemak.
Nitih ku Dennis, perintah nadai kala enda ibuhka komuniti Orang Ulu nyengakaum bansa Penan ti sekeda agi nadai ngembuan dokumen pengelala tu.
Ku iya, nyadi pengari rayat, kami deka nyaup sida nentuka dini endur sida ada lalu ari tumpuk pendiau ni sida datai sereta ke bukai nyukung sida minta tingki enggau surat pengada.
Iya madahka nadai nanggul sekalika deka bejalai jauh napatka menua ulu ba sitak nya, tauka di pasar tauka mengeri besai, kami deka gawa kelebih agi peranak ti minta saup ba peminta dokumen pengelala diri.
Iya berasai lantang enggau pemujur ba peminta surat pengada Hana lalu iya ngansak peranak ke diau jauh di menua ulu Baram ngambi ngerejista tikah sida ngambika muntang ngaga surat pengada bala anak sida.
“Kitai naka ulih mantu sida nengah atur pengawa ke patut ngagai sida ke minta tingki tauka surat pengada, ukai semina nemu bejaku ngapa enggau nadai diputar baka dipadahka penyakal sekeda bansa Penan bedau ngembuan dokumen pengelala,” ku iya.
Ba lansa ke bukai, Pemesai Unit Mindah Kin Kitu JPN, Affrizan Bujang madah, dalam taun nyin tadi bala sida bisi bejalai gawa ngagai Penan Apau Nyring, Long Puak, Long Silat, Long Aton, Ba Lau, Ba Abang, Long Sait enggau Ba Pakan lalu semua tu ba bagi menua tengah enggau ulu Baram.
Ku iya, diatu tim tu deka bisi ba kandang menua Lawas nyengkaum ba Ba Kelalan, Long Senadoh, Long Sukang, Long Tuma enggau Bekenu.
“Naka ke diatu mayuh Orang Ulu udah nganjung pemintah nengah unit mindah kin kitu dalam taun nyin tadi sereta taun tu,” ku iya nerang silik.