Anda di sini

Perintah nengeri setuju numbuhka URDA

Advertisement
 Abang Johari maya berandau enggau pengarang berita ba aum media ditu, kemari.
NERANG: Abang Johari maya berandau enggau pengarang berita ba aum media ditu, kemari.

KAPIT: Perintah nengeri udah ngaga pemutus numbuhka Ejensi Pemansang Ulu Rajang (URDA) dikena ngemataka pejalai pengawa ngemansangka Bagi Menua Kapit enggau sekeda kandang menua di Bintulu.

Kepala Menteri Datuk Amar Abang Johari Tun Openg madah, pemesai kandang menua ti nyadi tanggungpengawa dipegai ejensi tu iya nya 38,000 km² tauka sebagi ari pemesai nengeri Sarawak.

“Kitai udah mutuska ejensi tu deka betuaika Sapit Kepala Menteri II Tan Sri James Masing lalu disaup Sapit Menteri Pemansang Menua Pesisir enggau Kandang Menua (KKLW) Datuk Alexander Nanta Linggi nyadi sapit iya.

“Seduai mega deka disaup Sapit Sekretari Perintah Nengeri Datuk Ismawi Ismuni, Ketuai Eksekutif RECODA Tan Sri Wilson Baya Dandot, Sarawak Energy Berhad, Residen Kapit enggau Bintulu,” pia ku iya madah.

Iya mantaika pemutus tu maya aum media sepengudah mendingka penerang pemansang pelilih Kapit ba Dewan Suarah Kapit, lemai kemari.

Penatai iya tu disempulang Sapit Kepala Menteri I Douglas Uggah Embas, Masing, Nanta enggau Menteri Pemansang Perengka Guna Mensia Mayuh Dato Sri Stephen Rundi Utom sereta bala pemesai enggau pengari rayat ke bukai.

Abang Johari madah, ejensi tu ku iya deka mantaika ripot sentang pemansang enggau pelin pemansang ngagai ‘Regional Corridor Development Authority’ (RECODA) iya ke ngembuan tanggungpengawa nentuka pemansang ba Koridor Kuasa Ulih Dikena Baru Sarawak (SCORE) ti betuaika iya empu.

“Ejensi tu beguna amat dikena perintah nengeri nentuka rayat di menua pesisir bela ngasaika pemansang.

“Nengah ejensi tu kitai mega muntang ngungkupka agi nyengkaum agih dikena ngatur pemansang betanam betupi, dagang temuai enggau pemansang infrastruktur ke bukai,” ku iya madah baru.

Kelimpah ari nya Abang Johari maya tu madah, pelilih tu bisi awak dikemansangka enggau pengawa ti bekaul enggau betanam betupi kelimpah ngasilka kuasa karan ari tekat ai Baleh, Murum enggau Bakun.

Berindik ari nya iya mega madah, komiti kabinet Program Transformasyen Menua Pesisir nengah ejensi ke bekaul kelimpah iya empu deka bebendar nyukung ngemansang kandang menua ti dipegai URDA nya.

Ba pekara bukai, iya bela madahka nengeri tu patut berunding jauh agi nyungkakka pengelantang ngagai rayat di menua pesisir baka ngaga projek nyambung bekal ai beresi ti ulih diambi ari tekat ai sebedau diubat seraya ti ngasilka karan.

Tu ku iya ulih digaga laban perintah nengeri ngaga pemutus kediri empu ketegal tu endang reta rayat nengeri tu empu.

Iya madah, pemansang endang deka digaga tang semua nya meseti bisi pelin ke nyemetak baka ngatur pemeujur pengawa.

Sekumbang ke udah nyadi Kepala Menteri, tu keterubah iya, Abang Johari datai ngagai Kapit.

Penatai iya maya tu disambut enggau chukup basa nyengkaum ari raban parti politik, ejensi enggau opis perintah sereta mensia mayuh ke bukai.

  • oleh
  • Advertisement