KUCHING: Peminta nginsil Polisi Kabotaj endang pekara ke patut sereta pemutus engkeman dipejalaika perintah nengeri, pia ku Menteri Pemansang Industri enggau Orang Dagang, Pengawa Dagang enggau Pemeranak Puku, Datuk Amar Awang Tengah Ali Hasan.
Ku iya, nya senipak enggau nengeri tu udah chakah ngemansangka palan penyangkai kapal sereta chakah ngangkat industri produk bukai ti nangkanka produk besai.
“Nya (nginsil polisi kabotaj) sebengkah pekara ke udah dikenatai ngagai perintah besai, lalu aku chukup temegah ati laban tu mega sebengkah pekara ke chukup dikemeratka YAB Kepala Menteri.
“Tu deka ngemuntangka pengemeran sereta raban bansa kitai di Sarawak nerima barang import terus ari menua luar ke Sarawak, enggau enda ibuh ngetu tauka nengah palan penyakai kapal Klang.
“Pekara tu endang patut laban kitai udah ngemansangka palan penyangkai kapal sereta kitai mega udah ngangkatka industri kitai baka industri bepelasarka kayu, pengereja pengawa ba SCORE enggau sektor kebun bedandang besai mega udah nambah,” ku iya.
Awang Tengah mansutka pekara nya lebuh ditanya raban pengarang berita bekaul Kepala Menteri Datuk Amar Abang Johari Tun Openg ti deka nginsil Polisi Kabotaj.
Dulu ari nya Awang Tengah bejadika Seminar Padan Niaga “Peluang-Peluang Perniagaan dan Pengurusan Kewangan” ke diatur Suruhanjaya Koperasi Malaysia (SKM) ba sebuah hotel ditu, kemari.
“Diatu enggau pengerembai pemansang ke nyadi, nya alai Polisi Kabotaj endang patut diketuka. Berebak enggau tu kitai ulih nyeliahka sekeda produk ke diimport ari dichukai dua kali,” ku iya.
Nitih ku iya, diatu kapal ari menua luar baka ari menua China mega bisi udah terus sangkai ba palan penyangkai kapal di Samalaju enggau Tanjung Manis.
Kelimpah ari nya Menteri Pengatur Pemansang Pengeraja Asal enggau Rampa Menua mega madahka industri bukai ti nangkanka produk besai nengeri tu udah sedia napi ubah nya
“Kitai diatu benung chakah ngangkatka sekeda produk nengah inisiatif SCORE enggau industri bepelasarka kayu, kitai mega nyadi industri pemadu besai ngeluarka playwood enggau produk kayu bukai kelimpah ari produk elektronik,” ku iya.
Kepala Menteri Datuk Amar Abang Johari Tun Openg dalam ba p[rogram khas “Bersama Ketua Menteri Sarawak” ke dipancharka terus nengah TV1 ari Auditorium P.Ramlee di Kuching Malam ensanus, madah, udah datai ba maya ke patut perintah besai ngeinsil Polisi Kabotaj, ke ngelama tu pengawa nganjung barang import ke Sarawak nengah Palan Penyangkai Kapal Klang.
Iya madahka perintah nengeri udah ngenataika pekara nya ngagai perintah besai dikena ngurangka rega barang di nengeri tu.
“Tetiap barang dimport kitai nengah Palan Penyangkai Kapal Klang.
“Suba engka ketegal penyampau enda mayuh laban dagang antarabansa kurang tang diatu aku ngasaika udah mayuh dagang antarabansa entara kitai (Sarawak) enggau menua luar.
“Nya alai udah datai ba maya ke patut kitai nginsil Kabotaj lalu kapal ari menua luar ulih datai ke Sarawak,” ku iya.