KUCHING: Pengeran Parti Reformasi Negeri (STAR) nyereta Pakatan Harapan Sarawak (PHS) puntan pengudah ditulak Chairman Parti Keadilan Rakyat (PKR) Nengeri, Baru Bian.
Tekenyit enggau pemutus Baru, Presiden STAR Lina Soo madah parti diatu sedia ngadu gempung enggau semua parti penyakal di nengeri tu.
Ku iya, semua parti penyakal ditu patut begempung ngelaban munsuh iya nya Barisan Nasional (BN).
“Baru nengah penerang iya dulu agi ari tu madah STAR enggau Parti Bansa Dayak Sarawak Baru (PBDSB) sebengkah parti mit ke alai semua chalun kami lenyau duit chengkeram ba pengawa bepilih nengeri ke udah.
“Ketegal nya, PHS enda mai kami (STAR) enggau PBDSB begulai enggau PKR, DAP sereta Parti Amanah Negara (AMANAH).
“Tang enti diperati ba pengawa bepilih nengeri ke udah, mayuh agi chalun PKR ke lenyau duit chengkeram enti dibandingka enggau STAR,” ku iya ba aum pengarang berita di Kuching kemari.
Berindik enggau nya, Lina madah STAR mai PKR belaban bejaku ba maya enggau palan ke ditetap lalu bejuraika sentang Sempekat Malaysia 1963 enggau ‘Regionalism’.
Ku Lina, belaban bejaku ba mua mensia mayuh manah diatur lalu ukai semina entara STAR sereta PKR tang manah mega ungkup ungkup parti bukai.
Ngenang sentang Pengawa Bepilih Besai Ke-14 (PRU14) ti deka diatur enda lama agi, Lina madah mar deka mansutka penemu.
Iya enda nyangkal dia parti penyakal ke alah ketegal sida enda belajar ari pengilap ke udah.
“BN majak chakah lalu nguna mayuh teknologi baka ke media rama enggau mesin propaganda ti mantu sida ngulihka undi rayat.
“Media rama chukup beguna, tang STAR meseti jejimat maya nguna chara nya ba kimpin napi PRU14 ti deka datai,” ku iya.
Bela datai Sekretari Besai Simon Tiong, Ketuai Orang Indu Sylvia John enggau Pemantu Tukang Pekara Wang Albert Voon.