KUCHING: Perintah Nengeri deka ngenuku Undang-undang Strata dalam taun tu.
Kepala Menteri Datuk Amar Abang Johari Tun Openg madah undang-undang nya deka dikena ngintu pemaik begunan ti ngembuan palan komersyel enggau apartment ke dikumbai ‘soho’.
“Undang-undang sentang pekara tu enda chukup tegap ke alai semina dibungkur ba Kod Tanah-Management Corporation.
“Industri berumah diatu udah napi ubah ke alai dulu suba nadai soho. Berindik enggau nya kitai nadai undang-undang ngintu pekara lalu meseti dituku,” ku iya.
Abang Johari mansutka jaku nya ba aum pengarang berita pengudah bejadi Projek Berumah Taman Sri Maya di Pasir Pandak ditu, kemari.
Beambika chunto Viva City mall, iya netapka undang-undang nya meseti dituku ketegal lisin komersyel enggau palan diau (apartment) enda sebaka.
‘Luyar nengeri benung bejalaika pansik sentang undang-undang tu lalu disadang tembu ba taun tu.
“Pekara nya deka dibantai ba Aum Dewan Undangan Nengeri (DUN) ngambi tau disetuju,” ku iya.
Iya nambah, gaya diatu mandangka peranak ke beumur baruh 45 taun suah agi deka meli apartment lalu perambu ngenuku undang-undang sigi ngena ba maya ke diatu.
“Mayuh soho udah digaga di Kuching lalu kitai meseti nyendiaka undang-undang,” ku iya.
Ngenang kaul bukai, Abang Johari mega madah atur ngeluar surat pala tanah (rumah) enggau permit nguwan rumah (OP) deka dikemanah.
Ku iya, atur ngeluarka kededua pekara nya chukup berat ngambi kededua piak, iya nya pemeli rumah enggau kompeni begaga rumah bulih pemaik.
Iya netapka atur nya deka mungkur dua bengkah ijinsi perintah iya nya Opis Tanah enggau Penyukat(JTS) sereta SPA.