Anda di sini

SDNU deka nusun strategi baru dikena ngempung bansa Dayak, ku Mawan

Advertisement

SARATOK: Gerempung Bansa Dayak Sarawak (SDNU) ngembuan tanggungpengawa besai ba atur ngempung bansa Dayak di nengeri tu.

Presiden SDNU ke mega Kaban Parlimen(MP) Saratok, Tan Sri William Mawan Ikom madah gerempung besai nya deka ngatur pengawa enggau ransing agi udah tu.

Ku iya, pengawa deka meratka tanggungpengawa rama enggau ngerapitka penyerakup entara raban bansa Dayak.

Bansa Dayak meseti begempung nengah seiti perabung ketegal semina nengah gempung tu, semua atur pemansang ke udah diperambu ulih digaga enggau lanchar.

Gerempung ngasaika ngelamatu kitai bansa udah pambar ketegal mayuh pekara enggau isu.

Ketegal nya berengkah diatu, SDNU deka nusun strategi ngambi ulih ngempung bansa Dayak, ngambi kitai ulih segulai sejalai,” ku iya.

Iya mansutka jaku nya ba pengerami ngintu 30 Taun Rumah Dayak Saratok malam ensanus.

Mawan pechaya, enti (SDNU) deka mansang ke mua lalu nyadi gerempung ti mai pemaik ngagai bansa Dayak, sida meseti enggau naka ulih matak raban nembiak enggau orang tuai nengah seiti perabung.

Ngenang kaul bukai, Mawan ngarap SDNU pampang Saratok ulih ngintu Rumah Dayak nya enggau manah.

Iya madah bantu deka seruran diberi ngagai SDNU lalu ngarapka kerejasama ari semua kaban gerempung.

Enti rumah tu diintu manah, kitai ulih ngatur mayuh pengawa ditu lalu udah tentu deka mai pemaik ngagai semua.

Rumah Dayak tu seiti kelai ti mai reti ke besai. Kitai di Saratok patut berasai temegah ketegal ti bisi Rumah Dayak,” ku Mawan nambah.

Mayuh bengkah main bisi diatur rambau pengerami malam nya ke bela disaup Kelab Gagung Saratok.

Bela datai Chairman SDNU Saratok Jeti Kumpai enggau ketuai bansa ke bukai.

Advertisement