Semua program berumah patut ditembu lengkas ngambika ungkus projek enda kelalu tinggi
KUCHING: Kepala Menteri Datuk Amar Abang Johari Tun Openg kemari bejadika Projek Rumah Taman Sri Maya di Pasir Pandak ditu.
Projek ke beungkus RM25.5 juta nya nyendia rumah ungkup raban bumiputera lalu nerima bantu (geran) penyampau RM3.2 juta ari Unit Peneraju Agenda Bumiputera (TERAJU).
“Perintah Sarawak deka majakka projek berumah di nengeri tu lalu semua program dikearap ulih ditembu enggau lengkas.
“Enti projek lubah dikereja, tau endar nambah ungkus ke alai perintah enggau naka ulih nguna teknologi ti dikemisi ngambi kereja digaga enggau efisyen,” ku iya.
Iya mansutka jaku nya ba aum pengarang berita pengudah bejadika sebengkah projek rumah ditu, kemari.
Projek ke berengkah ba bulan Jun 2014 tembu digaga ba bulan November 2016 ke alai pengawa dikemujur Petra Jaya Properties Sdn Bhd (PJPSB).
Penyampau 12 iti rumah ke berega entara RM280,000 nyentuk ngagai RM650,000 digaga dalam kandang tanah pemesai 18 ekar.
Dulu agi ari nya Chairman PJPSB Tan Sri Datuk Amar Hamid Bugo ba jaku pengelalu madah kerejasama manah ari perintah udah ngujungka projek nya digaga enggau manah.
Ku iya, TERAJU meri geran ngagai PJPSB lalu geran nya udah dikena nyendia rumah ke ulih dibeli rayat kelimpah nyendia sekeda insentif ngagai pemeli.
“Nengeh geran nya, kitai ulih meri awak ngagai pemeli milih sekeda insentif ke bisi disedia.
“Keterubah sida tau milih subsidi RM300 sebulan ungkup timpuh 3 taun tauka milih putung RM10,000 ari bayar deposit rumah.
“Seiti agi insentif ke tau dipilih iya nya bantu meli perengka rumah,” ku Hamid.
Ba pengawa nya kemari, Abang Johari bisi nyuaka ‘replika’ kunchi ngagai pemeli rumah Taman Sri Maya.
Bela datai Menteri Kereja Raya Dato Sri Fadillah Yusuf, Menteri Muda Pengatur Pengeraja Asal Datuk Mohd Naroden Majais, Menteri Muda Perengka Guna Mensia Mayuh Dr Abdul Rahman Junaidi, Kepala Pemesai Eksekutif TERAJU Dato Husni Salleh enggau ke bukai.