Polisi ti dipejalaika perintah tu mujur meri pemaik ngagai rayat ti kurang penatai pemisi, ku Masir
SRI AMAN: Bantu Rayat 1 Malaysia (BR1M) udah diberi perintah kenyau ari taun 2012 lalu bisi dipeda nyaup ngelempungka tating belanja rayat ti kurang penatai pemisi di menua tu.
Sapit Menteri Dalam Menua II Masir Kujat madah, berindik ari pemujur meri bantu tu ba taun 2012, dia perintah udah neruska bantu nya ba taun 2013 nyentukka taun tu (2017).
“Bantu tu udah meri pemaik ngagai 4.7 juta ruang bilik lalu 2.7 juta individu ke bedau kawin ba selampur Malaysia.
“Keterubah BR1M tu diberi suba, nya semina siti polisi meri bayar sekali aja ngagai ruang bilik ti bepenatai pemisi kurang ari RM4,000 tauka individu ke bedau kawin ti beumur 21 taun ke atas enggau penatai pemisi enda ngelui RM2,000 sebulan,” ku iya.
Iya ke mega Kaban Parlimen (MP) Sri Aman madah munyi nya lebuh bejaku ba Pengerami Nyuaka BR1M 2017 Renggat Parlimen Sri Aman ke bepalan ba Satidum Mini Sri Aman ditu pagi kemari.
Masir madah, BR1M tu iya nya siti bantu ke udah disemaya Datuk Seri Najib Tun Abdul Razak, Menteri Besai Malaysia rambau pengawa bejuraika bajet ungkup taun 2012.
Kelimpah ari bantu tu (BR1M), perintah mega udah meri Bantu Sekula iya nya sepenyampau RM100 ke diberi ngagai semua nembiak sekula primari enggau sekondari di serata menua.
“Bantu tu dipeda udah ngelempungka urung 5.3 juta nembiak sekula di serap menua lalu tuju bantu tu diberi ba pun taun maya sekula buka kena ngemudahka pengawa bebelika perengka sekula ungkup tetiap nembiak sekula.
“Tating apai indai dipeda ulih dikurangka laban bala anak ngena duit bantu ke diberi perintah kena belanja meli kereban tulis enggau bup. Bantu sekula tu mega ngayanka penyiru perintah ngagai penanggul ke ditapi rayat iya nya tating penusah ti ditapi apai indai tiap kali buka sekula lebuh ti nyediaka bala anak ngambi teulihka pengelantang lebuh maya besekula,” ku iya.
Kebendar, perintah ari baruh pegai Datuk Seri Najib Tun Abdul Razak endang siru ngagai penanggul ke ditapi rayat enggau mayuh macham bantu ke udah diberi sebedau tu kena ngurangka tating pengidup rayat.
“Ambi ke chunto kedai 1Malaysia, Menu 1Malaysia enggau Kelinik 1Malaysia ke dipeda mayuh udah mantu ngelempungka tating rayat, kelebih agi sida ti kurang penatai pemisi,” ku iya nandu.
Beserimbai enggau tu, ku iya, semua pengawa ke udah digaga perintah patut diserenih sereta ditemu laban tetiap bantu ke diberi perintah iya nya siti tanggungpengawa perintah ngagai rayat ke begunaka bantu.
“Kitai tu rayat Malaysia patut nemu penyiru perintah lebuh ti meri bantu ngurangka tating pengidup rayat dalam bemcham sukut pengidup.
“Pengawa kitai iya nya sama ngemujurka langkar tu kena nyapai status menua mansang maya taun 2020,” ku iya nyemetak.
Sama bisi ba pengerami nyuaka bantu nya kemari Pemesai Pelilih Sri Aman Ismawie Salleh, Temenggong Samuel Lawen, Temenggong Abang Bohari Abang Zen sereta ke bukai.
Lebih 300 iku peranak ke patut nerima bantu di Parlimen Sri Aman nerima voucher sida nengah pengawa nyuaka BR1M ditu kemari.