KUCHING: Gempung Pengajar Sarawak (STU) enda setuju enggau perambu Opis Menteri Pengeraja Asal enggau Rampa Menua ti ngelanggur deka ngadaka subjek rampa menua ba sekula.
Kebuah pia ku Presiden STU Jisin Nyud, laban pekara nya udah disengkaum dalam subjek ke udah bisi diatu baka Jaku Melayu, Jaku English enggau Pelajar Moral sereta ke bukai.
Pekara bekaul enggau rampa menua mega dipegulaika sereta diajar lebuh sesi belajar enggau ngajar di sekula, ku iya.
“Diatu ba sekula kelalu mayuh subjek baka subjek teras, meseti diambi enggau subjek tambah. Enti ditambahka enggau subjek rampa menua tentu mayuh agi pangka kelebih agi ti mungkur belanja enggau pengajar ke ngajar subjek tu.
“Pelajar pasal rampa menua mega bisi diajar ngagai bala nembiak maya aktiviti Ko-kurikulum nengah ‘Kelab Pencinta Alam Sekitar’ (PALS) ke dibantu ejensi ti bekaul,” ku iya madah ngagai Utusan Borneo.
Iya mansutka penemu nya lebuh dipinta meri timbal bekaul enggau Opis Menteri Pengeraja Asal enggau Rampa Menua ti deka ngelanggur ngagai Opis Menteri Pelajar iya nya subjek rampa menua patut ditumbuhka ba sekula, apin lama.
Kelimpah ari nya iya bepenemu pengawa beratka rampa menua tu mega ukai semina bepun disekula aja tang mega bepun ari rumah enggau raban bansa.
Mayuh piak mega ulih sama ngambi bagi dalam pekara tu laban pengawa nyaga rampa menua tu mungkur tanggungpengawa semua orang, ku iya.
Nitihku Menteri Pengeraja Asal enggau Rampa Menua Datuk Seri Wan Junaidi apin lama, opis menteri iya deka berandau enggau Opis Menteri Pelajar pasal perambu ngadaka subjek rampa menua ba sekula.