Dikarang Rengenyan Labang
KUCHING: Setipak enggau pemansang sereta pemesai guna teknologi moden dalam pengawa penyambung ti penabur penerang sereta kaul rama, Angkatan Zaman Mansang Sarawak tauka AZAM Sarawak sebaka enggau gerempung bukai, nguna perengka internet nyadika kereban ngempit kaul enggau orang ti dituju.
Taun 2014, AZAM Sarawak udah mujur nempa seiti sejarah baru dalam AZAM iya nya numbuhka ‘AZAM Online TV’ ti dipenyadi Sekretari Perintah Nengeri enggau Chairman AZAM Sarawak, Tan Sri Datuk Amar Mohamad Morshidi Abdul Ghani, kemari.
Nitihku Kepala Pemesai Opis AZAM Sarawak, Datuk Aloysius J. Dris madahka, tuju sida numbuhka Online TV nya dikena ngemuntangka pengawa ngerembai penerang pemansang di Sarawak nengah chara online.
Nambahka nya ngarapka ulih ngerapitka kaul enggau ‘Netizens’ (penguna internet) lebih agi ngagai nembiak rebak baru, ku iya.
“Tuju penumbuh ‘AZAM Online TV’ tu mega ngambika nyadi kereban alternatif dikena meri penerang ngena chara multimedia ngagai orang mayuh.
“Kami mega ngarapka pekara ke dipejalaika kami tu meri pangka positif lebih agi dalam ngatur Outreach Programme, sereta ngarapka kami ulih tetapika peminta ari raban orang ke dituju.
“Orang mayuh mega ulih meda ‘AZAM Online TV’ nengah Youtube iya nya video dalam online ti pemadu besai kelimpah ulih dipeda urung 1 billion penguna ari serata dunya,” ku iya dalam jaku pengelalu pengerami bejadika ‘AZAM Online TV’ ditu, kemari.
Online TV mega disikap enggau aktiviti penyambung ke udah lama dikemeranka AZAM baka nengah radio, media chelak enggau ke bukai.
AZAM Sarawak sebengkah gerempung ukai dikuasa perintah (NGO) ti deka ngemudahka pengawa pemansang di sarawak nengah pengawa ngemujurka komunikasyen pemansang.
Ditumbuhka ba taun 1983, AZAM deka nyadi penyungkak pemansang di Sarawak enggau nyadi chuan teladan dalam bejalaika program pemansang ba mayuh bengkah renggat.
Dikena nentuka juluk penumbuh iya, AZAM mantu perintah nerangka polisi enggau program pemansang ti dipejalaika perintah sereta mai orang mayuh sama bejalaika tanggungpengawa dikena ngemujurka pemansang.
AZAM nulung perintah dalam program ngemansangka menua enggau ngangkatka pemereti mensia mayuh nengah kaul rama enggau penyambung ti manah agi.
Raban orang ti dituju program AZAM tu nyengkaum ketuai raban bansa, peranak menua pesisir, raban nembiak enggau orang indu, ketuai sereta pengereja pengawa perintah, raban media, nembiak sekula enggau orang mayuh.